Regen洩私隱 報警認蠢
歌手張惠雅（Regen）在睡夢中遇上電話騙徒，不虞有詐將自己的身份證號碼、個人資料一一「奉獻」給騙徒，自嘲「愚蠢」的她最近少看「警訊」，因為擔心「賴嘢」，嚇到即刻飛奔到警署報案求助。
前組合HotCha成員Regen（張惠雅）昨晨在facebook自爆遇到電話騙徒，又自嘲愚蠢將自己的全名、屋企電話號碼及身份證號碼也說給騙徒知，她形容自己「賴嘢」，她在facebook留言透露收到速遞公司電話：「話我有郵件，如果查詢按0，然後一個男人接聽，問我名字加身份證（號碼），我好愚蠢咁講晒出嚟……話我6月11號（日）寄咗一個包裹，（喺）深圳扣留咗，話查到有十幾本護照，我呆咗……我話要報警……對方又好堅持要幫我轉駁到上海公安報案……我cut咗對方線，好恐怖……」
被指包裹遭扣查
遇上騙徒的Regen因擔心自己的個人資料被盜用，昨午三時已到東涌警署報警求助，Regen說：「因為我無為意，接通電話係個講國語嘅男人，成件事我覺得好真，因為我以前（網購）都喺嗰間速遞公司買過嘢（送貨），所以佢問我全名同身份證號碼核對資料，我好低能咁講晒，連屋企電話都講埋。」當聽到對方指她的包裹被扣查，又聲稱查到有十幾本護照，她覺得好奇怪，愈聽愈不對路，她就表示要報警，她說：「佢好似有少少淆底，話要我打去上海公安定報案，加上我又聽唔清佢啲國語，唔知佢係咪心虛，我話唔講收佢線。」
立即向親友求助
定下神來的Regen細心一想，每次正常網購或者要核實身份證，都不會攞晒全部冧把，由於成件事怪異，她即致電家人及朋友求助，她笑說：「知自己賴嘢！呢排我做嘢冇乜留意警訊。」Regen解釋因當時被電話嘈醒，矇矇矓矓才答了問題，她笑說：「第一次接觸呢啲騙案，都唔係蠢呀，我都冇畀（銀行）戶口冧把佢，不過都係報警安全啲。」
至於好姊妹張紋嘉（Crystal）對Regen大懵遇上電話騙徒就笑說：「Regen蠢咗。」Crystal大讚Regen為人沒機心，她說：「明白佢個人冇防範人嘅心，成日令我擔心，佢點都唔會諗人呃佢，（佢將啲個人資料講晒畀人知！）我都戥佢驚，佢咁搞笑，我轉頭會WhatsApp佢叫佢小心啲。」
文：音樂組