羅霖半百D胸惹o靚妹妒忌

亞姐出身的羅霖於1991年參選時曾以泳衣亮相，今年她為了處女寫真集豁出去，已24年沒影過水着的她今次去得更盡，以火紅色比堅尼上陣，大騷弗到漏身材與凍齡外貌。昨日《好報》獨家披露了羅霖在寫真集其中一款性感泳照，羅霖表示只有兩款水着造型，該款已是最性感，更可算是她的「封胸」之作，她說：「呢本寫真係首本，亦係最後一本，50歲着水着已經係我嘅性感底線，就算再出都唔會有咩突破，所以唔會再影。」

一口拒絕長期飯票

絕響泳照曝光後，羅霖稱想不到會引來眾人關注，更有女生妒嫉：「好多謝《好報》幫我做咗個封面，好榮幸，估唔到有咁大回響，真係好多人睇，好犀利呀！今日（昨日）出街有好多人打量我嘅身材，最搞笑係搭升降機時，有兩個20幾歲嘅女仔，竟然當我面話『都唔係好大啫！睇唔出咁大。』搞到我好尷尬，都係第一次遇到呢啲情況。」

羅霖一身純白曳地晚裝，展現高貴一面。	羅霖舉起拇指大讚《好報》，報道出街後更收到不少鼓勵。	羅霖希望親身到書展感謝粉絲。

羅霖指今次寫真想傳遞正面訊息，藉以鼓勵單親媽咪逆境自強，靠自己活得更精彩，自爆曾有老闆問她是否需要長期飯票，但被羅霖一口拒絕，她透露昨日有男士就此鼓勵她，揚言會支持她，令她大受感動。報道出街後，羅霖亦收到很多朋友電話，大讚照片拍得靚，揚言要封她為偶像，她笑言：「我真係受寵若驚，唔使咁大件事，只係身材keep得弗啫。」

寫真未出先賺六萬

羅霖坦言初時心想只要寫真不蝕本便叫有交代，但反應卻出乎意料地好，寫真仍未正式發售，便已賺到六萬元，將會撥捐慈善機構，羅霖得悉不少粉絲想要其親筆簽名，她感激眾人支持及希望可入書展親身會見粉絲。

另外，羅霖除了忙於宣傳新書外，還有涉足美容及紅酒生意，她透露將計劃發展與娛樂界有關的生意，預計年底成事，如此忙碌豈非沒時間拍拖？她坦承現階段搵錢至上：「我年紀唔細，搵得幾多得幾多，為咗三個小朋友將來生活穩定啲，佢哋係我最大嘅目標，我為佢哋將啲（拍拖）機會都推咗，三個仔放首位，自己放最後。」

文：名人組