李治廷被祖兒氣場震懾
熱愛打籃球的李治廷能與NBA球星林書豪在球場上較量，他大為興奮，對女神陳妍希的堅毅、勤力，他極度欣賞，又發現天后容祖兒有股凌厲的氣場，架勢十足，但卻是一位可愛女生，經常開心到大笑不停。
在《武則天》飾演唐高宗「雉奴」的李治廷（Aarif）人氣飆升，最近Aarif忙於與容祖兒、陳妍希、金大川、耿樂等參與內地真人騷節目《報告！教練》。
在球類訓練中，Aarif最擅長打籃球，進攻、防守都有一手，最令他興奮是與NBA球星林書豪在球場上較量，Aarif笑說：「絕對冇得同呢位籃球巨星較量，不過有機會同佢一齊打波，真係好開心，佢打波好勁，我哋都好夾，講嘢又中又英，不過佢好搞笑，講兩句就講咗英文，我變咗做佢翻譯。」
妍希可愛
跟陳妍希、祖兒經過兩個月的連串訓練，Aarif坦言對兩位女星極度欣賞，他大讚妍希好可愛、勤力：「佢對每一項運動都好認真，有次打羽毛球，我衰多口話訓練得都唔夠『啃』，劇組即刻安排我哋兩個喺沙灘練，我做開運動都覺得好甘，佢應該好辛苦，但佢好堅持。（對女神心動？）唔會，係好欣賞佢呢種毅力。」
不談情事
Aarif同樣讚賞祖兒：「佢好犀利，應該有練開，覺得佢做每項運動都好架勢，好似有股氣場，佢又玩得、又鍾意笑。」之前他跟祖兒並不熟落，經過今次合作，他發現祖兒可愛的一面：「佢玩到哈哈大笑，原來天后、女神都係凡人。（你喜歡怎樣的女性？）最緊要睇緣分、感覺，但依家都係將心思放喺事業上，暫時唔諗感情事。」
文：音樂組