張晉殺破5億 蔡瀚億等拜師
張晉、彭懷安（Eddie）及蔡瀚億等昨晚出席《殺破狼II》慶功宴，監製黃柏高即場公布將會開拍第三集，今集打得出色的張晉剛接獲消息，他謙稱要睇新一集預不預他參演，而自封「小學雞槍手」的蔡瀚億已計劃拜師學武。
太陽娛樂文化電影《殺破狼II》昨晚於銅鑼灣舉行慶功宴，慶祝電影在香港票房已達1,300萬，而中港兩地合計票房則突破5億，張晉、彭懷安（Eddie）及蔡瀚億（Babyjohn）等與台前幕後收到好消息，《殺II》監製黃柏高即場公布：「由於電影得到廣大內地及全球觀眾鍾意，將會全力以赴，盡快開拍第三集！」眾人更向導演鄭保瑞送上5個壽包，慶祝他11日生日之餘，亦寓意他是5億導演。
受傷唔好呻
張晉在《殺II》打鬥落力換來5億票房，他說：「好開心，呢套係男人戲，但消費力始終由女性主導，能夠吸引到女性入場唔容易，證明套戲質素好！太太（蔡少芬）都有睇。（老婆覺肉痛？）佢會諗我拍嘅時候有幾痛，佢見過我跛住腳返屋企，連瞓覺都要忍住。（會拍第三集？）啱啱先知，睇佢搵唔搵我？搵都要睇角色，但第三集應該會更好。」
他透露早前拍新片《葉問3》受傷：「傷肋骨同手腕，但做動作演員就唔好呻！我拍完《葉問3》即刻剃晒啲鬚，我唔鍾意長時間一個樣。（補拍點算？）唔關我事，我離開咗劇組。」他又指身傷不及心傷：「呢兩日返到屋企，老婆返咗內地拍真人騷，個女去咗長洲玩，得自己一個，苦過受傷！」
自認小學雞
Babyjohn則期待開拍第三集：「知《殺II》5億票房好開心，係我第一部破億嘅電影，同導演傾過，佢話下集畀我繼續開槍，今集我係小學雞槍手，下集一定要熟練。（打埋功夫？）準備搵師傅學，我見張晉打，睇到乜嘢叫功夫。」
早前與女友朱慧敏感情陷於危機的Eddie表示二人磨合中，他說：「端午節佢話要游龍舟水，我話去泳池，佢話去沙灘，仲窒我：『你唔喺浴缸游』，我哋和好緊，但要時間磨合。」
文：影視組