陳細潔珍藏酒王 好過買鑽石
鯊魚女陳細潔（Abbie）愛紅酒，相信社交圈無人不知，家中有個小酒庫，珍藏逾千多支上乘紅酒，十大名酒當然少不了，而價值十多萬的世界酒王Romanee-Conti更是她的得意收藏。Abbie花在紅酒的費用逾千萬，但完全覺得是物有所值，揚言買酒好過買鑽石。
與Abbie談起紅酒，完全開正她的話題，由最靚的紅酒、她的最愛、初學者可選擇那類型的紅酒、如何保存紅酒，以不同地方出產的紅酒，要用不同的紅酒杯品嘗等，她都十分有研究，滔滔不絕一一分析。走入Abbie家中的酒庫，過千支的紅酒有秩序地，根據着出產地、年份排得密密麻麻，每說起一支紅酒，她都小心翼翼地拿出來。談到最貴的收藏，她拿起來自法國著名產酒區Bourgogne出產1988年的Romanee-Conti，她說：「呢支係世界酒王，飲一支少一支，我都唔捨得飲，價值十幾萬，但都好少人會攞出嚟賣。佢嘅細佬（年份較淺）都係靚酒，因為呢個酒莊出嚟嘅酒都好搶手，佢用最靚嘅葡萄釀製，每年一出就畀人搶購一空，好難買到。」
講求個人口味
法國另一個著名的釀酒區波爾多（Bordeaux）的紅酒，亦是Abbie最愛的收藏的地區之一，家中的紅區有90%來自這兩個地方，她拿着波爾多的酒王1983年Petrvs說：「呢度出產嘅酒一定好，飲就算唔同年份嘅酒都好靚。」Abbie從來不覺得貴酒就一定好飲，她說：「飲紅酒係好個人口味，有啲人鍾意果味重嘅，有啲就鍾意dry啲嘅、硬朗嘅，唔係最貴嘅酒就最好飲，我嘅最愛係1983年嘅Lafleur，萬幾蚊一支，我依家都係得番七、八支，佢嘅酒味好似花香，任何女性飲咗都會愛上，但佢哋嘅產量好少，巿面上好難買到。」
而巿面上最為人所熟悉的1982年Lafite，Abbie覺得因為被人炒起，出了名，但卻不值這個價，她說：「Lafite根本就被中國人炒起咗，82年嘅成四、五萬一支，但我覺得over price，如果萬幾蚊就差唔多，雖然好多人鍾意，但唔係我最愛嘅口味。Mouton係依家另一隻被炒嘅紅酒，成萬幾蚊一支，啲人因貪佢個名『武當』容易叫。」
揀男友要識飲
Abbie是紅酒癡，多年來收藏紅酒花費了逾千萬，但她一點也不覺得浪費，她說：「我覺得好值得，因為我鍾意，好過攞錢買鑽石，紅酒都好有升值潛力，不過我唔係為咗炒。」因紅酒而認識了一班「同道中人」，生活圈子亦擴闊了不少，她說：「依家每個月都會同愛好者一齊品酒。（將來嘅伴侶係咪要識飲酒？）當然，呢個係最基本，曾經有個男友，佢樣樣條件都好好，但就一滴酒都唔飲，我覺得好冇癮，最後唔睬佢。」問到何時開她珍藏的酒王？她說：「要搵到一個真愛而又識得欣賞紅酒嘅人，就會為佢而開。」
文：名人組