翠如7日唔洗頭：我都幾臭!
藝人黃翠如的「女神」形象可謂自我幻滅！她前晚錄影節目時，自爆養成不洗頭習慣，最長紀錄更高達七日，自己也坦承：「我都幾臭！」對此，男友蕭正楠（Edwin）卻表示：「就係鍾意佢咁特別！」
黃翠如前晚偕張繼聰、龔嘉欣、張振朗等代表新一輯處境劇《愛．回家》錄影無綫節目《今晚睇李》，翠如BB居然無懼破壞「女神」形象，自爆全家人都養成不洗頭習慣，皆因自細媽咪稱「唔洗頭係好事」，又指中學時最長五日不洗頭，出埠更試過足足七日不洗頭，還笑言「頭油出出吓就唔出」，認真誇張！
座駕立立亂
問到男友有否投訴有異味？跟蕭正楠（Edwin）蜜運中的翠如，笑稱每逢拍拖就會洗頭，因為怕陣味攻到對方，故男友也不知這個秘密，她又補充：「好多時唔鍾意洗頭，所以我都幾臭。」報道出街後怕否被嫌邋遢？翠如笑謂：「唔會，識咗之後會洗頭，之前試過剪短頭髮，因為想留長頭髮，所以成日洗。」
相反，她坦言Edwin乾淨得多，更稱曾遭男友「哦」其座駕、手袋太凌亂，她說：「佢成日問我幾時先想執車。（佢有幫手？）有試過，但好快就放棄。（咁邋遢驚唔驚嫁唔出？）唔關事啩，呢個係我性格，融入咗我度，冇計。（男友接受咗？）我覺得係，因為佢依家見到我架車，頂多畀個表情再長嘆一聲。」
要重新評估
Edwin昨日坦言翠如座駕立立亂，對於女友不洗頭的習慣，他笑言要捉對方去驗頭蝨，又冧爆道：「要重新評估佢，七日唔洗頭，頭髮咪似餅咁！（破壞『女神』形象？）呢個就係佢個性，我就係鍾意佢咁特別。」 老拍檔洪永城則笑謂：「七日冇洗頭好閒啫，我試過七日冇沖涼啦！（戥Edwin慘？）可能佢都好鍾意咁呢，呢啲叫臭味相投呀！」
文：影視組