Monnie牛氣沖天腰誘Chilam
昨日最新一期《好報》追訪落選港姐「牛雜妹」李美琪（Monnie），在父親經營的粉麵舖以「10項全能」身手坐鎮，近日獲多間公司睇中的她，連偶像張智霖（Chilam）老闆蕭定一都有意向她招手，昨日Monnie就穿露腰裝和家姐齊與蕭定一洽談合作細節，Monnie賣口乖大讚蕭定一見識廣博，又放風表示希望可同Chilam合作！
22歲的元朗「牛雜妹」李美琪雖然在港姐首輪面試後已被淘汰，不過卻意外得到網友留意而人氣急升。昨日出版的《好報》追訪Monnie一日的「牛雜日誌」推出，期間見她在父親經營的粉麵舖幫手，見她由剪牛雜、沖奶茶及招呼客人都很熟手，絕對是「10優乖女」！近日Monnie更獲多間模特兒公司睇中，連其偶像張智霖老闆蕭定一都有意將她收納旗下。昨日下午四時許，穿短Tee長裙露出小蠻腰的Monnie在家姐陪同下，往蕭定一公司與蕭定一會面。
讚蕭定一見識多
近一小時後，蕭定一的工作人員陪Monnie與家姐離開，問Monnie是否與蕭定一簽約？她謂：「只係見面了解大家意念同方向，經過今次，覺得蕭生見識廣博，教識我好多嘢。（簽蕭定一成數高？）冇話成數高唔高，係就係，唔係就唔係，簽約最重要睇方向係咪一致。（條件方向係咪一致？）冇傾條件，概念最重要，會考慮清楚再決定。」
問是否想與Chilam合作？Monnie笑着說：「當然！除咗Chilam都想同其他前輩合作！（如果蕭定一開戲畀你同Chilam？）相信呢個係Bonus嚟！太長遠啦，未去到呢個階段。」而蕭定一昨接受本報電話訪問時讚Monnie口才好：「以佢咁嘅年紀講嘢好叻，如果成功簽佢，會畀佢主持同拍戲。」他又透露昨只是與Monnie初步會談，主要講解娛圈運作：「佢咁新，都叫佢返去諗清楚。（幾時要答你？）無限期嘅。」
Monnie昨接受電話訪問時中表示感謝蕭定一欣賞她，談到若Chilam到她舖頭食麵，她坦言必會親自下廚，更會請Chilam食麵。
Kianny寸退選者
同樣落選的「長髮妍希」Kianny寸爆今屆不少佳麗退選，她說如自己入圍一定不會放棄：「參選就預咗畀人爆料同跟蹤，承受唔到就唔好參加！」問Kianny有否覺得因拍拖太高調及因是非累事？她謂：「我係面試怯場同唔識應對先落選，唔理是非。」退選佳麗「弗版楊洛婷」Mandy則在社交網上載自己在台北旅行的相，並留言：「退選後最開心就是可以瘋狂任食！」
港姐等你起底
爆料熱線：3600 1022
爆料傳真：3600 1000
爆料email：ent@on.cc
文：專案組
採：影視組