吳若希獨招減壓出浴大叫
「女神」吳若希（Jinny）算是近年極速上位女星中的表表者，由歌手到做主持到拍劇，更憑一曲《越難越愛》捧走「金曲金獎」，難怪惹人眼紅，除數之不盡的包養傳聞外，彷彿就連上天也要為難她，讓她經歷母親炒單車重傷入ICU的考驗，繼而再招來網友的惡意攻擊，令她飽受壓力。對於壓力，Jinny獨有一套紓緩方法：「沖涼嗰陣喺浴缸大嗌！」女神即是女神，連減壓方法都那麼惹人遐想！
不怕言論 保護家人
出道以嚟的確有好多莫名奇妙嘅報道，但呢啲報道唔會令我唔開心，因為我會同自己講：會令自己情緒唔好嘅嘢，就唔好睇啦！我覺得自己嘅情緒管理一直有進步，我都好佩服自己面對嗰啲失實報道，點解可以唔嬲嘅？當然，拍劇其實對學習處理情緒都有幫助，其次係我唔覺得嗰啲報道傷害到我！
只有嗰啲影響到我身邊人嘅報道，先令我唔開心，譬如：我同前男友嘅親密相流出，個人認為啲相真係冇問題，點解啲報道都可以小事化大？搞到好似喺動物園睇動物咁！我明白，記者都係做份工啫，我哋要互相幫助，所以後來我都話，如果傷害我，可以令大家得到娛樂，我OK！對我生活上冇實質影響，我唔介意！但我最唔開心影響到屋企人，或者令佢哋為我而擔心。
傳我戀上成熟男，因為已經脫離現實，所以對我同媽咪傷害唔大，我哋都知道根本冇可能，只會當笑話睇，拍《倩女喜相逢》時，話我介入蕭正楠（Edwin）同黃翠如戀情，點會呀？我見到Edwin同翠如BB時都會互窒，根本傳聞都唔係真，亦冇乜好介意囉！有時我都會諗，係咪我太多口，先至會傳咁多緋聞呢？但若果我將自己收埋，啲報道咪又會話我係孤獨精。我放棄啦，算！我情願做番自己，最緊要過得開心！
衰衝動遺傳媽咪
我細個唔識諗，心急衝動，試過自殺，嗰刻係受到情緒左右，事後諗番，覺得自己都好無聊，但我呢種急嘅性格係遺傳自媽咪，不過我依家已經收斂咗，遇到會令情緒波動嘅事，我會提自己要深呼吸三下再三下，咁可以令自己冷靜啲。上次喺《勁歌》頒獎台上攞金曲金獎，我就深呼吸咗三下，因為當時被人圈（催促），冇時間，如果唔係會再深呼吸三下至講得獎感受。
對比起以前唔開心到要自殺，依家唔開心我多數自閉唔見人，之後會沖涼，沖涼嗰陣喺浴缸大嗌！純粹發洩唔開心，再喪唱一輪歌，又或者喪跑做運動，令自己身水身汗。近排工作太忙，冇時間大嗌，不過大嗌對於我嚟講係好正常，我最鍾意嗌「我嘅人生呀！」
演戲釋放 唱歌滿足
舊年過得好充實，但我從來唔係為達到某啲目標而工作，只係一心諗住做好啲嘢，我唱《越難越愛》都冇諗過會攞金曲金獎，只係一心想做好佢！今年都希望將樣樣工作做好，雖然拍咗兩套劇，自覺真係做得差，連自己都想鬧自己，希望觀眾評價唔係太差！我真係幾鍾意演戲，想演好似韓劇嗰種悲劇添，又或者江湖大家姐、慘到歇斯底里嘅角色咁，對我嚟講會係種釋放，平日嘅吳若希點會隨街喊？但我好想借演戲試一次！
講到尾，我最愛嘅始終係唱歌，試過拍劇期間好想唱，有晚9點收工後就一個人去唱咗兩粒鐘，好滿足，好爽！我相信呢一世都離唔開唱歌！
結婚生仔有晒計劃
我做嘢好有計劃，要清楚知道自己喺度做乜，step by step，咁先對得起「我嘅人生呀！」我有冇計劃過幾時結婚？有！我諗過到咗25、26歲（依家22歲）生活穩定無憂，可以做啲慈善事業，到咗28、29歲就搵個伴侶，31、32歲結婚，35歲生小朋友，不過我淨係得個諗字，都冇實際行動，或者我應該喺26歲前買咗樓先，咁樣可以易啲有完整家庭。不過我唔可以好似我首歌《炊煙》咁，只滿足做個煮飯婆，我由入行已經想做慈善事業，近排計劃想捐錢畀母校，幫師弟師妹。
雖然距離自定嘅結婚日期仲有十年，不過我嘅擇偶條件應該唔會有好大改變，雖然我性格比較心急，希望身邊有啲慢嘅人，平衡番我啲心急，但如果要個慢條斯理嘅男仔做我另一半，就唔好喇！我怕我忍唔到呀，做朋友OK！
後記：包養？手機有答案
吳若希久不久就被傳獲有米男士包養，報道總是把她說成很貪錢似的，雖然她也曾呼冤否認，但坊間一於少理。不過如果看到她的手機，對謠言定會有另一番體會，但凡曾經為女友出機的男士，又或像美劇《心計》中Patrick那樣強於觀察的人，都很難以置信，如果一個女子真如傳聞般被包養，她怎會容忍自己使用一部爛mon的手機？
「我勾到條電話線，跌爛咗個mon，我份人真係好心急o架！」吳若希如是說。
口述：吳若希
筆錄：影視組
攝影：黎志輝