阮兒「愛」入屋 恨戀孝順男

阮兒捱了九年，終憑《愛‧回家》的「Pinky」一角廣為觀眾認識。

又名「荷蘭妹」的前港姐阮兒（Chloe），自細於荷蘭長大，2006年回港後因想找工作才選美，之後又被發掘唱跳潛能，與其他幾位少女組成女子組合：「之後就自然入咗行，喺無綫四年。巧合地有機會畀我唱歌跳舞，入咗支女子組合，但嗰間公司唔想再搞娛樂嘅嘢，於是解散咗。」

至今捱足九年，Chloe坦言全因自己唔輸得的性格：「做咩都好，開始咗就唔放棄，嘥咗咁多年青春，我唔想再浪費！上年年頭有機會返無綫拍《愛‧回家》，入行咁耐未試過有個咁重要嘅角色，咁多對白畀我發揮，真係好感恩！」

除了事業，阮兒亦希望盡快覓得真命天子。

阮兒（後排左二）多得一班《愛‧回家》的前輩演員教路，學懂放鬆演戲。

學識調節心情

Chloe更感激劇中「馬家」對她的照顧及教導，令她進步良多，由初初緊張手震到現在學識調節心情：「初初好緊張，好驚做錯，每個機會我都覺得係最後一個，所以好想做到最好，但係愈緊張就愈做唔好，慢慢學識點放鬆。依家出街有人認得，仲開口叫我Pinky，開心觀眾認同我嘅努力！」她坦言想嘗試不同角色，目標更是攞獎。仍是單身的Chloe也直言想盡快找到真命天子：「最緊要係對我好同對家人好！」