Tony Jaa絕世好爸 為女打天下

Tony Jaa是港產片忠粉，2003年的《拳霸》讓他初為香港觀眾熟悉，12年後的今天，他終在港產片《殺破狼II》亮相：「我睇過好多香港動作片，模仿過佢哋嘅動作，首次同香港電影界合作，溝通冇難度，因為電影同動作係世界共同語言。套戲除咗動作仲有父女情，我首次演呢種情節，令我去到另一種層面，畀我可以邊打邊喊，將來要我拍純文戲都冇問題！我好易投入角色，因為現實中我都係個兩歲女兒嘅父親，我會竭盡所能保護兒女，可以為女兒做任何事！」

視像解相思

被問作為人父拍戲會否變得錫身？Tony Jaa說：「我喜愛呢個工作，會盡力、瞓身，但會更注意安全，打不單是打，還要有策略！收工回家女兒都有問我做乜手瘀咗？佢會呵番我，雖然未教佢功夫，但佢已經識跳起踢腳，係遺傳吧！佢睇過我嘅戲，記得啲動作。（有同張晉、吳京交流湊女經？）拍戲空檔都有交換仔女啲相睇，講吓仔女成長歷程。每當掛住個女就會視像通話，佢畀到正能量我。」

雖然Tony Jaa（右）跟張晉打到飛起，但兩人當不用埋位時即大談湊女經。

Tony Jaa在新片飾演慈父，他笑言可開拓新戲路。

望進軍中國

Tony Jaa靠「打」出一片天，去年更參與荷里活巨製《狂野時速7》：「我要求自己每日練功兩至三個鐘，如果今日工作忙做少咗，聽日要補番。（想打入中國市場？）拍《殺II》係第一步，我係港產片fans，都希望進入中國市場。（你由低做起，有咩想同年輕人分享？）生命不容易，有時贏，有時輸，你應該做好每一天，為世界帶來快樂同和平。希望年輕人睇完《殺II》，都收到為生命加油嘅訊息。」

文：影視組

攝：李廣成