林欣彤 龔柯允 體驗廣東歌
音樂人趙增熹、林欣彤（Mag）及龔柯允（Karen）將首戰舞台劇，雖然馬來西亞人Karen對於今次本土味極濃的舞台劇未能全有共鳴，但她亦揚言要透過演劇感受廣東歌，而貴為「本地薑」的Mag就話舞台劇令她感慨CD漸被淘汰，但仍希望音樂可以繼續生生不息。
趙增熹、林欣彤（Mag）及龔柯允（Karen）即將一同參演舞台劇《勁金歌曲3──請你記住我》，首次挑戰舞台劇的三人其實結緣於趙增熹的出面介紹，趙增熹表示：「因為導演話想有新衝擊、新鮮感，同埋貼近依家個年代，我一諗就諗起佢兩個。」對於趙增熹的邀請，兩人亦義不容辭地答應孭飛主角。
起初難有共鳴
本是馬來西亞人的Karen對於香港的流行曲其實認知不多，但她表示藉今次的機會可以加深對廣東歌了解：「我哋聽嘅可能同香港聽嘅唔同，排劇嘅時候好多歌都唔熟悉，好似有幕係用Twins歌曲嘅歌詞對答，Mag好有共鳴，但我就冇，不過可以透過劇本學番，融入香港人嘅集體回憶。」問到Karen可有在劇中發掘到從未見過的「寶藏」？她表示因為排劇而愛上了《守望》：「完全講中咗我心聲，逐句逐句睇啲歌詞時，覺得好啱我依家嘅心情，好懷念以前細個咩都唔諗嘅時候。」
慨嘆CD漸淘汰
聽廣東歌大的Mag就話自細愛「咪」音樂，出街更會帶住CD Walkman：「以前真係會擺時間落音樂度，一播CD仲會拎實歌詞簿。」講到劇中談到CD漸被淘汰，Mag直言有共鳴感失落：「但我唔相信音樂會被淘汰，希望好似套劇一樣，雖然冇咗個實體，但音樂唔會只規限喺一啲現實條件中。」
文：音樂組
攝：張福宏