發哥淪通緝犯 美棋BB呵番

美棋：「點解我會咁鍾意發哥呢？因為佢夠親民，好多市民都見過佢，又野生捕獲到佢搭港鐵啦，或者九龍城買餸，我細個開始拍戲儲咗好多相，就係差發哥未儲到！到依家都未見過佢真人，其實我唔介意喺街度野生捕獲佢。」

發哥：「講開又講，我呢，又唔係人又唔係畜牲，變咗通緝犯，有鬚嗰啲呢，有個榜通緝，做咩搞成咁，我依家要蒙面，我好似參加咗恐怖組織咁，唔見得人，又好似塊面爛晒咁，唔知邊個搞呢單嘢出嚟，搞到我人不似人，鬼不似鬼，動物又唔似動物，禽獸又唔似禽獸，通緝犯又唔似通緝犯，叫苦連天，你唔好搵我喇！冇咩嘢你唔好搵我喇！見到我你行開，擰轉面走啦！我都唔想做人喇！」

美棋BB	發哥笑言蒙面出街似參加恐怖組織，令他叫苦連天。

搭巴士夠方便

美棋：「大家成日都捕獲到發哥你搭港鐵，但點解冇捕獲到你搭巴士呢？」

發哥：「有o架！你摷番網啲相吖，你見到有個阿伯耷晒頭喺度瞓緊覺，嗰個就係周潤發嚟o架！嗰時又肥腫難分呢！冇依家咁英俊呢！我成日搭巴士！慳水慳力，唔使行樓梯吖嘛！港鐵要行吖嘛！巴士點對點不知幾方便。」

美棋：「點解你成日去九龍城街市買餸嘅？因為我聽聞係特別貴喎！」

發哥：「你呢啲外人梗係貴啦！我收晒陀地，好似收租咁，我打開個袋，個個揼嘢落去，咩都唔使錢，不過你唔好學喎！畀人斬死都未天光喎！」

讚偶像好靚仔

得到發哥的搞笑回覆，令美棋BB笑爆嘴，但仍死心不息，繼續想捕獲發哥，她說：「發哥呀發哥，其實你係好多人嘅偶像嚟嘛！所以你搭巴士呢，你唔好覺得自己人唔似人，鬼唔似鬼，其實大家都好想見到你真面目呀！你依家咁靚仔！咁英俊！你講o架嘛！大家都想親近你多啲，想野生捕獲你嘛！」

文：陳偉立

採：戴穎怡、關穎賢

攝：秦健輝、司徒國榮、唐豁莊