霆鋒寫神曲考陳奕迅唱功
歌神陳奕迅（Eason）等足多年，其新碟終於獲老友謝霆鋒操刀作歌，昨日新歌宣傳片率先曝光，片中「吹神」Eason和「Chok王」霆鋒以不修邊幅造型對話。Eason日前公開獻唱這首歌，唱至青筋暴現，他笑說有問霆鋒「係咪考我？呢首歌唔係咁啱唱現場。」
陳奕迅與謝霆鋒是多年老友，最近Eason出碟，霆鋒終於出手為他作歌，更送佛送到西，親自上陣與Eason拍新歌《起點．終站》宣傳片，片中兩個大男人進行男人的對話。一個「Chok王」，一個「吹神」，兩人打扮都不修邊幅，並雙腳蹺起坐在梳化閒聊，霆鋒戴Cap帽，穿背心短褲和赤腳，Eason則一頭亂髮，邊傾偈邊摷亂頭髮，非常隨意。
自嘲聽歌老土
兩人分享炮製新歌感受，霆鋒自言是聽歌好老土，不太接受現今的音樂，他仍停留在七、八十年代的搖滾樂，鍾意聽搖滾樂手Bon Jovi的音樂，是典型Rock友。
Eason稱與霆鋒經過幾次聚會，霆鋒終交了一首名為《Nic Rock 7.1》的歌曲，不久又再收到個「7.2」版本，但聽不出兩者有何分別，追問霆鋒他竟答「唔記得」，最後才發現是少了段副歌，Eason望着霆鋒笑言：「佢好畀心機去設計一啲嘢，即係考我囉。」
唱至青筋暴現
Eason又指霆鋒的歌寫得好撕裂，他要代入霆鋒角度來唱。日前Eason首次現場演繹這首歌，唱至青筋暴現，事後Eason不禁笑說：「我嗰時都有問佢係咪考我？呢首歌唔係咁啱唱現場。」
文：音樂組