「唔好通知我老婆！」發哥撩小齊飛車
第22集《我愛發哥》昨日在《東網巨星》App播出，歌手兼演員任賢齊與神級影帝周潤發隔空交流，發哥笑住叫小齊帶他飛電單車，小齊則笑言正努力賺錢，準備邀請發哥出演他下套執導的電影。
小齊：「大家都知發哥係我偶像，我好鍾意發哥！仲有佢個人好Nice！」
發哥：「喂！幾時去騎電單車搵埋我呀？但係唔好通知我老婆，靜靜哋同我鍊一轉，我冇牌o架！你睇住我呀！」
小齊：「有時我喺街度，見到發哥周圍行好自在，好多人都想同發哥影相，但如果幾百人圍住你都要影，點解決呢？因為我都有遇到呢個問題，發哥你會點解決呢？」
盡量滿足影迷
發哥：「最好就係影影影影影影，喺你覺得時間許可之內盡量影，如果超過你時間上限，譬如你預五分鐘、十分鐘你都可以忍受到，但影影吓不可控制喇！唯一辦法打999啦！要警車護送你，一係話我父母喺餐廳等緊我，又或者佢哋唔舒服要睇醫生，大家一定原諒你，仲有，用手機嚟張大合照，佢哋自己WhatsApp番，自己分番張相咪得囉！」
小齊：「我希望自己做導演嘅戲，首映時可以邀請發哥嚟睇，你得唔得閒呢？」
發哥：「你幾時首映呀？套戲叫咩名？恭喜你做咗導演！點解你做導演都唔搵我呀？」
獲得發哥回覆，小齊High爆狂讚偶像，更表示下套戲想找發哥做男主角：「好榮幸呀！多謝發哥，果然係我偶像！佢所有嘅方法同處理方式都可以滿足大家，我會試吓，如果真係好多人排隊同我影相，我就試我有幾多時間，如果趕飛機就等唔到喇！但如果成晚冇嘢做咪影囉！我拍套戲叫《我的澎湖灣》，希望下次可以請到發哥做主角啦！」
文：陳偉立
採：衞紫敏、曹家誠
攝：秦健輝、唐豁莊、鄭家俊