陳嘉桓減壓遊此開始

「讀萬卷書不如行萬里路」，Rose喜歡旅行看世界各地不同的文化、建築、風土人情、品嘗當地美食，旅遊可令人忘記煩憂，亦是減壓的好方法，所以Rose一不開心就想去旅行放鬆心情：「當唔開心時去旅行，可以完全放低所有嘢，睇吓新事物，輕鬆吓，最重要完全唔開手機，唔好畀外界人騷擾。另外即興去旅行都好開心，我試過早上6點起身買張機票，跟住坐9點幾機，話走就走，冇目的、冇行程，冇計劃就咁去旅行，個感覺好正，將唔開心嘅嘢忘記，輕鬆自在。」

外表硬朗內裏柔弱

Rose打女出身，予人感覺硬朗，但她亦有少女可愛的一面，旅行不忘帶上她的至愛，她說：「我旅行會帶好多嘢陪伴左右，我平時玩嘅公仔、玩具。雖然我好似好男仔頭，同朋友出街食飯，因為我有揸車，我會車晒啲朋友返屋企先；又可能自己做娛樂圈呢行，見識嘅嘢比人多，好似好識嘢咁，所以喺朋友心中係好強。」

陳嘉桓充滿陽光少女氣息。	沖繩島公主look	巴黎艾菲爾鐵塔

即使外表開心硬朗，但亦有柔弱的一面，面對不同的困難，促使她成長，但無論如何她也只是24歲的女孩，她說：「其實我仲好細個，當遇上問題，也會不知如何應對，以前只會逃避，特別係網絡嘅世界真係好厲害，網絡言論、被人抨擊，早幾年真係好在意，會好唔開心，但依家學會點樣面對，當你做呢行就要知道你好多嘢都要面對廣大巿民，而每個人都有佢哋自己嘅睇法，你唔可以做到樣樣合他人意，要輕鬆去面對，慢慢去接受，如果有壓力，我會喺屋企畫畫，將唔開心嘅事用畫去表達出嚟，另一個減壓方法就係去一個無人嘅遠處，跟住大叫出嚟，釋放自己。」

作者身份亮相書展

旅行成為Rose生活中的一部分，她熱愛將自己的所見所聞與眾分享，所以年前推出旅遊書介紹泰國，今年將再接再厲推出旅遊書介紹近年港人的熱門旅行地——韓國，並將於書展期間推出，Rose大為興奮謂：「以一個作者嘅身份出現書展，好興奮，以前行書展成日覺得小說作家好厲害，可以憑空想出好多情節，諗好多構圖出嚟寫成書。」

對於今次的韓國旅遊書，Rose謂與泰國的大有不同：「之前泰國主要介紹好玩嘅景點，而韓國就比較日常生活化啲，我去咗好多次，搜集咗好多資料，加上香港近年好興韓風，我介紹邊度有平嘢賣，化妝品、衣服、得意嘢，同埋當地菜巿場，仲有啱香港人口味嘅韓食，所以好適合香港人睇。（去韓國有乜難忘？）最難忘係好多韓國人識講國語，同佢哋溝通冇問題，好有親切感。」

試皮褸大汗疊細汗

旅遊上令Rose難忘的事情也着實不少，其中一次是泰國的跳蚤巿場，在沒有冷氣的地方試着皮褸，大汗疊細汗亦要強忍，最終不敵又平又靚的皮褸，而買下不少。也難忘在法國一個小島的城堡用膳，那裏有個很大的玫瑰花園，她說：「我好鍾意花花草草，好愛大自然嘅清新香氣，嗰次仲去咗香水廠，試調香薰，跟住帶咗個好香玫瑰花味蠟燭放喺行李箱裏面，返到香港打開行李，一陣陣玫瑰花香，令人回味。」

Rose下一次目的地希望孭着背囊遊歐洲，她說：「我可以一個人去旅行，但當然最好有多個，因為一個人影唔到相，我好鍾意到處影相，將我所見所聞影低，留住每一刻。」

獲何國鉦賞識

Rose既是演員又是兼職模特兒，她還記得初入行時才16歲，憑着高挑的身材，獲本地設計師何國鉦賞識，起用她擔任模特兒在北京及上海行騷，當時情境她還歷歷在目：「我好記得當時嘅模特兒都好高，個個高我半個頭。（有冇被打沉士氣？）咁又冇，我見到全職模特兒為keep fit戒口戒得好清，我一定唔得，我唔食嘢會頭暈。」