陳瀅BAR女愛掃食男
陳瀅（Jeannie）入行數年已憑劇集《四個女仔三個BAR》進身女神之位，加上家境富裕，與其劇中角色可謂同出一轍。惟不同的是，Jeannie從未恃「靚」行兇，亦不愛靠父蔭，反而一步一步打好根基，試圖撇甩「花瓶」形象，做個穩打穩紮的女演員！深明走紅就要付出代價的Jeannie，一路走來亦受過不少挫折，先因角色被網民針對，後因家底勁而被誤會「唔憂做」，幸好她早已看透這個「潛規則」！有樣、有錢、有學歷的Jeannie，卻偏愛事業心重的「為食男」，要捕獲女神歡心原來毋須靠樣！
被網友批評嚇窒
Jeannie拍畢《四》劇後旋即上位成為新一代女神，惟其女神之路並非想像中順利，去年劇集《女人俱樂部》播出時她試過飽受批評，更被嚇至不敢出門見人！
我唔太熟悉香港嘅討論區文化，但我諗係角色令觀眾鍾意我，好開心聽到大家讚我演技進步咗！上年拍《女》劇嗰陣，個角色搞到我不斷受網民批評，佢哋會留言話「照吓鏡啦！點配得上其他六個女仔？」我覺得超恐怖，我封鎖咗佢哋留言，佢哋就去其他演員度留言，話我有問題，接受唔到批評就封鎖人。
當時我勁唔開心，唔敢出街，出街都會戴黑超同帽，唔係怕畀人認到，係因為好驚。嗰時都有啲同事傾過，佢哋叫我唔好理，後來睇得多都慣咗。
處事獨立慣被寸
有說要走紅就要付出代價，榮登女神寶座的Jeannie，換來的就是鋪天蓋地式的起底新聞，無奈遭起底的她直言不希望家人受騷擾。
其實都介意講屋企嘢，都唔鍾意人哋討論我屋企，我屋企人都唔鍾意。我近呢三、四年都好獨立，離開咗屋企嘅照顧，依家自己住，自己處理所有生活瑣碎事，想畀觀眾知道我好獨立。
試過有人因為我屋企好，就寸我話我唔使做，不過已經遇到慣晒。你話擔心導演同監製會咁諗？當然唔希望件事發生，但都冇所謂，因為個個都係咁講，又唔係唔見得光。
睇前輩演戲偷師
成功真的需「父」幹？贏在起跑線上的Jeannie，卻認為成功靠七分努力、三分運氣。戲裏戲外同樣做女神的她，希望擺脫靚女路線，向打女之路出發！
條路順唔順好靠自己努力，當然都要運氣，亦要睇自己有冇努力爭取機會！我每次睇番自己表現，都會執自己邊度做得唔好，我拍《女》劇時講嘢好快同唔清楚，個口成日擘唔開，依家我會成日提點自己。不過我唔敢請教前輩，反而會企埋一邊睇佢哋，好似陳慧珊都唔介意我去探班睇佢做戲，我睇到佢邊樣做得好，自己下次就會試吓做。
嚟緊我會專注拍戲拍劇，仲會學功夫、語言裝備自己，唔想淨係做女神呢啲斯文角色，想衝破自己界限，最想做打女！今次喺新劇《殭》都唔係演靚女，個角色充滿仇恨，成日諗住殺人同報仇。我一拍戲就會好投入，唔理自己靚唔靚，所以唔會有包袱。
愛人要識廣東話
Jeannie在《四》劇演大小姐Brittany演得深入民心，現實中又有位從商的爸爸，莫非擇偶都要No money, no honey？實情是比起靚仔富二代，她更鍾情有上進心的「大隻男」，惟她慨嘆未有追求者。
我好鍾意食嘢，所以男友都要咁為食，如果大家都鍾意食嘢，就可以叫到成枱嘢食，自己又可以每樣食啲，剩番就留畀佢食！雖然我喺外國長大，但到依家都未試過同外國男仔拍拖，可能因為我由婆婆湊大，諗法比較傳統，覺得男仔最起碼要識講廣東話，過年要識拜年。
揀男友的話，我覺得經濟條件唔係重點，反而係睇佢對事業有冇目標同上進心。至於外形，我鍾意高大嘅男仔，靚仔就唔一定，因為大隻啲有安全感，同埋自己係肥底，所以唔會搵個瘦過自己嘅人。不過依家冇人追，好慘，我都想知點解！可能因為我喺工作環境都係專心做嘢，好少會傾偈，又少同男仔交流。
後記： 挑戰何雁詩
《四》劇帶挈陳瀅升呢做女神，亦捧紅陳凱琳、劉佩玥及何雁詩，外界難免會比較各人的事業發展，然而Jeannie無懼與好姊妹較量：「每個人發展唔同，何雁詩唱歌，陳凱琳同劉佩玥拍劇。我就比較自由發展，起初做模特兒到拍戲再拍劇，可以畀觀眾睇到唔同方面嘅我，亦切合自己性格。」她更公然向何雁詩下戰書：「其實《四》劇中我最想做何雁詩個角色，我覺得我去做會搞笑過佢！」
口述：陳瀅
筆錄：張浩恩
攝：劉斌
場地：Frites Belgium on Tap
服裝：bread n butter
化妝：Vanessa Wong
髮型：Mike @ indulgence