影帝紅星妙問妙答莊思敏愛發式幽默
為慶祝「神級影帝」周潤發登「六」，《東網巨星》炮製特備節目《我愛發哥》，邀得25位紅星與發哥隔空吹水！踏入第四周，發哥繼續與一眾紅星有層次、不分年齡性別界限大爆頂癮金句，一句簡單的神回覆，快樂原來很簡單！
莊思敏
《東網巨星》裏面有個《我愛發哥》專題，平時發哥答問題已經好風趣幽默，究竟發哥會有乜妙問妙答呢？記住緊貼住《我愛發哥》，發哥I Love You！
王宗堯
有筍嘢同大家介紹！《東網巨星》入面嘅《我愛發哥》，有一班紅人紅星同發哥隔空對話，唔睇就走寶嘞！
衛詩雅
我知道近排好多人追睇《我愛發哥》，我真係好羨慕啲藝人可以問發哥咁多問題，發哥又答得好生鬼同好好笑，希望下次可以輪到我問發哥問題啦！
蔡瀚億（Babyjohn）
《我愛發哥》？我有追o架！最難忘係發哥曾經去戲院睇我之前拍嘅電影，仲對我講咗一番好鼓勵嘅說話，好多謝你！我愛發哥，大家都愛發哥，記得睇實《東網巨星》。
第16集：阿Sa反獲封偶像
蔡卓妍（阿Sa）演技愈見精湛，面對「神級偶像」周潤發，阿Sa問他偶像係邊個？發哥竟答：「偶像呀……咪你囉！你最近好紅嘛！你套戲個個都稱讚嘛！但我又遺憾啦！我做唔到任達華囉！我做到佢咪……正晒囉！」連「這些福利也不屬於周潤發的」，任達華就爽啦！
第17集：柏豪為周氏爭光？
發哥同周柏豪都係姓周，發哥除讚柏豪靚仔，為周氏家族爭光，仲讚佢歌精舞勁。柏豪就問發哥鍾唔鍾意唱歌？發哥就開咗張期票畀柏豪：「我唱得先得o架，鬼叫我五音又不齊咩！可能退休唔做演員，重新搵Ｍiss Chan Chan、Teresa、曾路得學番十年八載，80零、90歲開個Concert，你慢慢等！」等多廿年啫，柏豪一定等！
第18集：阿嬌識歎有「代價」
鍾欣潼（阿嬌）自爆同發哥一次「神之遇上」，冧到佢暈陀陀：「有次我準備落的士，咁啱等的士嘅係發哥，佢幫我開車門，好禮貌又對住我笑，印象好好！」發哥即刻回覆，笑到阿嬌見腹肌：「上次同你開車門，你都未畀錢我，我記住呀！連利息一齊呢，都成十萬九千七！」
第19集：李思捷被勸飲酒傷身
李思捷早前扮「髮哥」，連自己節目都向《我愛發哥》致敬，咁惺惺相惜，思捷有個不情之請：「發哥你飲唔飲酒？第日出嚟飲兩杯吖！」發哥就勸思捷飲太多傷身：「呢樣嘢就唔好搞我，喂！你都唔好飲咁多喇！你飲開酒嘅，同我哋呢啲唔飲酒嘅唔啱傾，你搵過第二樣嘢同我傾啦！好嘛？」
第20集：陳嘉桓大膽問三圍
女神陳嘉桓原來對發哥嘅身材好奇，膽粗粗問發哥三圍！發哥就話：「呢個問題好私人嘅，唔可以立亂公開，因為我都有182o架，最近我又行吓山鍊吓骨，個師傅話我，又高咗兩個cm，我會將呢個運動拓展落去，可能再過十年八年，我可能會去到六呎八，嗰陣時分分高過你！」一招四両撥千斤，陳嘉桓都唔記得自己問乜咯！
文：專案組