高海寧晒廚藝食唔停口

高海寧十分孝順，忙完工作即計劃帶婆婆去旅行。

高Ling昨午偕同英皇歌手馮允謙現身美食活動，二人應邀品嘗台南美食，全程「食唔停口」，事後更被安排一展廚技，高Ling表現尚算似模似樣。一向喜歡旅行的她事後接受訪問，扁嘴謂：「忙拍劇起碼有八個月未去過旅行嘞！本嚟我有朋友嫁咗去韓國，我買張機票就可以飛去玩，住喺佢屋企，點知依家新沙士出現，搞到冇得去。」

高Ling表示友人指稱當地人對疫情顯得相當淡定：「可能佢哋未經歷過沙士啩，我朋友話戴口罩嘅通常都係遊客，希望病菌快啲消失，或者研究到根治嘅藥物啦！等我忙埋手頭上工作，預計八月都想陪婆婆去吓旅行休息，台灣會係唔錯嘅選擇，因為近嘛！」

高Ling與馮允謙展廚技，表現似模似樣。

高Ling試食食唔停。

徒手捉田雞諗起都驚

另外，近日忙於為新劇《愛情食物鍊》的高Ling，戲中化身賣魚妹。談到學習劏魚，她笑說：「呢樣都唔係最難，起碼我唔驚魚鱗，不過有場戲我要徒手捉田雞同鱔，就真係諗起都驚，我唔敢擔保自己見到田雞唔會大叫。」話雖如此，高Ling獲導演承諾，如果真的太害怕的話，可以改另一種拍法，向高Ling大派定心丸，認真憐香惜玉。

文：影視組