陳嘉桓望學發哥 嘜頭當錢使
昨日《東網巨星》App播出第20集《我愛發哥》，打女陳嘉桓（Rose）八卦妹上身追問男神周潤發的腳長、三圍及銀包放乜嘢！發哥未驚過照爆秘密，更笑言唔使帶錢出街，嘜頭就等於信用卡，並說：「唔通周潤發走你數咩！」夠晒豪氣！
Rose：「我細細個就睇你嘅戲，我好鍾意《秋天的童話》你個角色呀！」
發哥：「我就最驚人話細細個就睇我做戲，我都有留意你，你好打得！我知道！」
Rose：「我知你好高！嗱！我就有42吋長腿，我想知發哥你對腳究竟有幾長呀？如果你唔介意，不如話埋畀我聽你嘅三圍係幾多吖！我好想知呀！」
發哥：「呢個問題好私人嘅，唔可以立亂公開，女仔就冇咩所謂，男仔一講就唔好，我都有182，最近又行下山鍊下骨，個師傅話鍊鍊吓又高咗兩個cm，咁我會繼續將呢個運動拓展落去，可能過多十年，去到六呎八，嗰陣分分鐘高過你！嗱！我依家着波鞋，我美國碼都着45啦！當然有啲人着到50幾，嗰啲係打籃球，好出名嗰啲。」
「邊個敢收我錢？」
Rose：「我想問下你，平時出街銀包會袋咩呢？會有幾多錢，幾多信用咭呢？有冇好多散紙呢？又會唔會有同發嫂嘅合照呢？我好想知呀！」
發哥：「乜都冇呀！淨係帶張車牌、身份證、油咭，幾皮，幾皮唔係幾萬銀，係幾雞，因為我出去買嘢人人都請我食吖嘛！同埋我唔使信用咭，我個樣就係信用，我冇錢o架！邊個唔信我！唔通周潤發走你數咩！吓話！所以我周圍都係呃呃騙騙飲飲食食，我使乜帶錢出街？大家都係自己人！都係香港人。就算我爬入屋企攞啲嘢走，佢哋都話『隨便隨便』咁o架！邊個敢收我錢？傻嘅！」
得到發哥慷慨分享私人事，Rose心情大靚，希望下次有機會跟發哥面對面傾偈，繼續八卦：「多謝發哥呀！我會好珍惜今次同你對談嘅機會，原來你隻腳真係咁大，要着咁大號鞋！同埋，我都希望有日可以似你咁，帶少少嘢就可以出街，自己個嘜頭嚟做信用呀！」
文：陳偉立
採：蔡志豪
攝：秦健輝、張福宏