Kelly拍拖個半月 閃嫁金融才俊
陳蕊蕊組成的組合HunterZ成員Kelly（何麗娟）成功爬姊妹頭，將於本月底與拍拖個半月的金融上市公司股東許國柱拉埋天窗，日前兩人恩愛拖到實出席公開活動，女方大騷求婚鑽戒，男方則全程望住未婚妻，Sweet爆。
Kelly今年初在朋友圈認識從事金融的才俊許國柱（Raymond），他最終花上三個月時間成功將Kelly「私有化」，拍拖個半月的兩人上月底到台灣旅行，並入住六星級酒店過首個「二人世界Trip」，認定Kelly為老婆的Raymond炮製求婚驚喜，將房間放滿心心氣球及用花瓣拼成心心，最後取出巨型鑽戒跪地求婚，氹得「老婆仔」一口答應。
九月後擺酒
Kelly日前穿上連身裙拖住未婚夫Raymond出席活動，並大騷求婚巨鑽，兩人齊齊受訪，Kelly透露未婚夫從事金融，將榮升許太的Kelly透露與未婚夫拍拖個半月，她說：「我哋喺上星期訂咗婚。（拍拖個半月就結婚？）啱就結啦，愛情冇得講。（有咗？）唔係。」問到何時擺酒？Raymond說：「九月後，因為爸爸早前過咗身。」Kelly補充說：「會去外國行禮。」
跪地唔少得
Kelly透露已邀得蕊蕊做伴娘，問到不擔心對方的惹火身材搶去風頭？Kelly說：「唔驚，佢係我最好嘅朋友。」問到男方有否跪地？Raymond說：「呢啲唔少得。（求婚戒指幾卡？）幾卡唔重要。（唔驚食檸檬？）驚，不過有信心。」Kelly表示早已「聞到味」：「佢成日試探我，呢個月稱呼我為老婆，又同我講將來嘅小朋友。」
文：音樂組