衛詩雅獲力捧 吸林嘉欣戲場
英皇小花衛詩雅今年獲點名力捧，稍後將夥拍偶像張學友及林嘉欣演出新片，詩雅視之為難得機會，做足準備務求向兩位前輩盡情偷師。而她則「知恩圖報」低調現身撐經理人開設的新店，還賣口乖希望入股，實行跟對方學做生意！
加盟英皇多年的衛詩雅，據悉最近終獲老闆楊受成開金口點名力捧，希望她能於電影界殺出血路！一向勤力兼氹得人的衛詩雅，其實早已被英皇電影藝人部高層Oscar視為「親生女」，最近更為她爭取到機會，與學友及林嘉欣於《暗色天堂》內結片緣，戲份僅次於二人。詩雅相當重視這次演出，花上兩個月時間準備，更不時與兩位前輩圍讀及研究角色，身為導演的嘉欣丈夫袁劍偉亦對詩雅另眼相看。
努力鑽研角色
能與學友及嘉欣合作，詩雅即笑不攏嘴：「真係好期待，我係做佢哋嘅同事，好多對手戲，最開心可以同嘉欣傾吓學戲嘅嘢，希望佢介紹到啲名師畀我認識。」詩雅又指今次接演的角色與她性格大相逕庭：「要認真鑽研！依家未開工我都開始進入角色，成日周圍撩人傾偈，今次對我嚟講絕對係大挑戰。」
做生意興趣大
詩雅日前則低調現身Oscar與友人合資、位於天后的越南菜館新張儀式，當Oscar爬梯揭去遮掩招牌的紅紙時，詩雅知對方畏高，二話不說即幫手捉緊木梯，她更大賣口乖：「Oscar做生意叻，之前已開咗兩間日本菜館，今日嚟係睇吓佢會唔會受埋我玩，跟佢學吓嘢。我好鍾意做生意，諗過搞寵物美容、花店等，但香港租金太貴，要努力拍戲儲錢。」
文：影視組