吳京過招冇留手 硬食500腳
在《殺破狼II》中做臥底的吳京，自言面對泰拳高手Tony Jaa時毫不留力，惺惺相惜愈打愈起勁！但他卻指自己捱打多過打人，一場戲捱500腳的他更自言創下華語動作演員捱打最多的紀錄！即使如此他仍永不言休，誓要在人生繼續由頭打到落尾：「我仲好年青！」
吳京在電影《殺破狼II》中大晒一線動作演員功架，與其餘兩大動作巨星Tony Jaa和張晉大打出手、拳拳到肉。首次跟Tony Jaa合作的吳京大讚對手武功高強，令拍攝過程更為爽快：「第一次遇到個對手係唔使就住，可以放開去打，佢都好興奮，我哋完全打到唔收手！（驚打親佢？）唔會啦，Control到嘅。（邊個好打啲？）最好打係導演！」因為導演鄭保瑞令本身有傷的吳京「傷上加傷」：「最傷心遇到個咁殘忍嘅導演！（因為要你捱500腳？）一場戲咋！加加埋埋我就創下咗華語動作演員捱打最多嘅紀錄！」
最激鏡頭無奈剪走
問到哪場戲最辛苦？吳京即時想起監獄大亂鬥：「本身受傷，一Take過，兩日排演，一日拍。張櫈幾十Kg，如果跌落我塊面就真係冇o架喇！（唔錫身！）錫身嘅觀眾睇替身就得啦！」又指一些被剪走的場口亦極度慘痛，包括水刑戲份：「（水刑）一個生活體驗嚟，有幾可受呢啲苦？但真係死咁滯，太痛苦，拍咗幾個Take已經崩潰，唔想再NG，剪走咗好可惜！」
動作演員絕不轉型
談到有指他一年前曾表示不再拍動作片，吳京直言只是「美麗的誤會」：「嗰時個仔啱啱出世，見到佢喺ICU搶救嗰個樣，就好希望自己最後一次賭命，因為有老婆同仔喇。（想休息？）休息半年，湊仔陪老婆寫劇本。」雖然拍打戲高風險，但他仍會堅守動作演員位置：「你睇我談戀愛呀？你會買飛咩？我仲未去到盡o架，仲好年青！」
Wardrobe：Levi's
Hair：Vince Pang@IL COLPO Platinum
Make-up：Maggie Choy
Venue：W Hotel
文：影視組