思捷獲發哥呵番
第19集《我愛發哥》昨日在《東網巨星》app播出，無綫藝員李思捷對神級影帝周潤發的演出風格甚有研究，自爆經常模仿發哥演喜劇，並趁機邀請發哥飲番兩杯，不過生活健康的發哥大叫咪搞，更叫思捷戒酒！
思捷：「我好欣賞發哥，演技好又拎過影帝，但最鍾意係發哥演喜劇嘅Timing，好準！佢好睇之處係靚仔，《精裝追女仔》演追女仔戲分外好睇，加埋佢喜劇方法，成件事好自然，唔係誇咁做，我鍾意睇喜劇，長大之後除咗睇許冠文，第二個就係周潤發，未到周星馳個Generation，我覺得佢Timing好準，同埋佢演喜劇個Key係好高，高八度，陳錦鴻都係學佢！」
發哥：「你都犀利吖李思捷，又唱得又跳得又Talk得，犀利到不得了，我封你做偶像，我有睇你啲騷o架！你瓣瓣都掂，我好似你咁就真係不得了，我好欣賞你，多謝你讚許我！」
「我都學唔到你」
思捷：「唔知發哥你識唔識我呢？其實我好多戲都係抄你！好多謝你！」
發哥：「你又好嘢，我睇唔到你抄咗我啲咩，唔覺有周潤發影子，就算你之前有啲想做到周星馳咁，我都覺得係你自己風格，每個演員有自己抄嘅階段，依家李思捷好多嘢都係你自己，冇人學到你，我都學唔到你。」
思捷：「發哥你飲唔飲酒？第日出嚟飲兩杯吖！」
發哥：「唔好搞我，你喺節目度隊人細細杯嗰啲唔知咩嚟，五顏六色，喂！你都唔好飲咁多喇！你飲開酒嘅，同我哋呢啲唔飲酒嘅唔啱傾，你搵過第二樣嘢同我傾啦！好嘛？」
雖然「食檸檬」，但獲偶像回應，思捷一樣High爆，笑言可轉約發哥飲茶：「飲茶吖冇所謂！你鍾意食咩我就同你食啦！最多唔飲酒啫！希望我好似你咁帶多啲娛樂畀大家啦！我真係唔知你識我！你咁樣讚我，我真係開心到不得了！你係我目標，多謝發哥！」
文：陳偉立
採：林希孺
攝：秦健輝、司徒國榮、劉斌