夏春秋周嘉莉為《六時代》重出江湖

搞鬼主持 見證變遷

擁39年歷史六合彩踏入新時代，《on.cc東網》將於6月16日起直播六合彩開獎，屆時讀者可透過手機進入《on.cc東網》app全程直擊六合彩開獎過程，為六合彩歷史掀起新一頁，史稱「六時代」!「六合彩之父」夏春秋及「六合彩之女」周嘉莉有見及此，決定重出江湖，透過短片細說主持六合彩的秘聞及趣事！

最令人深刻的六合彩主持，莫過於有「六合彩之父」之稱的夏春秋。夏春秋主持六合彩達十八年之久，其生鬼的主持方法令觀眾留下深刻的印象，夏春秋說：「當初搵我做主持，都係鍾意我嘅主持風格搞鬼，有時候攪出連續號碼，我就會話：『嘩，又嚟一對姊妹號碼啦！』」六合彩對於夏春秋而言，是一個節目並不是報道，可以令他想出不同方法去主持，不過後來因移民而辭任主持一職。

「六合彩之父」夏春秋希望年輕一代的主持人薪火相傳，而嘉莉更希望與冬叔合作圓夢。

夏春秋希望在六合彩金禧紀念時能夠再主持一次！

搵人頂更最頭痕

回憶十八年來的點滴，夏春秋見證着六合彩的變遷，由當初一星期只有兩日開彩、只有36個號碼，增加到一星期三至四日開彩、攪珠號碼亦增加至49個：「以前一注先兩蚊，多寶獎有400萬好犀利o架啦！」主持六合彩的形象早已深入民心，即使「退休」多年，夏春秋每次出街都被街坊認出：「就算依家出街，都會有人話我係財神，仲有啲後生啲嘅師奶話，細個一開六合彩就坐喺電視隔籬睇我報，話要幫阿媽寫低啲六合彩喎！」

問現時的六合彩和當年有何不同？夏春秋說：「差好遠！以前攪珠室得一塊木板隔開！依家嘅攪珠室有鎖，出入都要登記！」主持多年的他亦有不少「執生」的經歷，夏春秋表示當年只有一部攪珠機，有次準備開彩前突然失靈，工作人員與他焦急非常，後來想到賽馬會有一部早年用來抽馬票的機器，惟有「頂硬上」，令當晚的六合彩順利開出！

夏春秋更謂當年最「頭痕」的是無法請假，他說：「做直播節目係會緊張啲，好難搵人頂更，時間要控制得好，試過一次搵驃叔（董驃）頂，佢做完一次之後就話以後都唔做啦！」對於當年因移民而離開工作崗位，夏春秋卻未有感到可惜：「人生就係變o架啦，搵後生仔女主持又有唔同效果！（想唔想再主持番？）又無技癢嘅，如果有大慶典搵我主持我都無任歡迎o架！」更謂最希望到2025年六合彩金禧紀念時，當時已達92歲的他可以有機會再主持一次！

文：影視組