龍小菌帶病涉偷：係我疏忽！

現年廿六歲的歌手龍小菌曾任職中學老師，出道時憑蒙面形象「賣聲不賣樣」成功突圍。前晚她涉嫌在鰂魚涌一間百貨公司超市內，在未付款情況下帶走店內五包總值約一百二十元的生果及蔬菜，被一名便衣保安上前截停並報警處理。她被帶到柴灣警署接受調查約七小時，昨凌晨一時許已獲准保釋候查，需於七月上旬返警署報到。

否認鎖手銬

龍小菌步出警署時，由經理人邵子風陪同下向記者親述事發經過。她說：「成件事經過係早幾日作感冒，個人『吽吽哋』，中午十二點左右去咗打拳，打到三點幾，跟住去咗超市買嘢，買咗啲滷水嘢食，畀完錢之後等佢哋整番熱，咁就去咗買啲菜做晚餐，之後返去滷水店，所有嘢放喺手推車，咁就行咗出去，之後有便衣職員截停我話有啲嘢未畀錢。」問到職員有否聽她解釋？龍小菌說：「佢哋冇聽，直接帶咗我去保安室，跟住就報警。」她否認被鎖上手銬帶署，但指有女警拖着她離開。

龍小菌在男友人接送下步入牛頭角一住宅。	步出警署，龍小菌即被傳媒包圍。	龍小菌在邵子風陪同下離開警署。

問龍小菌心情如何？她語帶輕鬆地稱：「我冇緊張，不過我啲朋友就好緊張，仲話我咁大懵，估到我會發生咁樣嘅事。（有冇落charge？）我都唔知，冇問，不過之後會再返警署。（可以出境？）我都唔知，冇問清楚。（搵律師？）原本我唔想搵，不過我家人叫我搵。（有冇發生過類似事件？）大懵事一定有，但唔記得畀錢係第一次。」

飛車撇傳媒

龍小菌接受完訪問後，與邵子風一同登上七人車離開，邵子風女友「蝦頭」楊詩敏亦在車上，另車上有一男一女友人，但七人車為撇記者高速前進，時速更達一百公里。駛經元朗八鄉時，男女友人落車，一度嘗試阻止記者繼續追訪。當途經青衣一個迴旋處，更險與一輛的士相撞，險象橫生。

昨午記者致電龍小菌詢問情況，她表示多謝大家關心：「因為尋日都喺警察局嗰度搞咗好耐，都好攰，今日（昨日）我再去睇醫生，醫生都話我係流行性感冒，咁我會休息吓啦。但發生呢件事，都覺得係自己疏忽嘅，亦都覺得保安員都係盡佢自己嘅職責……當然係一件唔愉快嘅事啦，但係自己都會將件事嘅實情如實地去話畀大家聽，所以希望大家都唔需要擔心我。」

文：專案組　

攝：追蹤組