吳綺莉體驗反叛 膠刀自殘

藝人吳綺莉囡囡吳卓林近日爆出「鎅手事件」，吳綺莉早前更指鎅痕多達30條，昨日吳綺莉約下午一時許獨自離開寓所，前往旺角拍攝有線玄學節目《羊年點算》時被記者包圍，被問到囡囡鎅手是否受同學自殺影響？她說：「你知我不嬲都唔鍾意講人哋啲嘢！」又承認將鎅手一事公開是「講錯嘢」。

天生男人命

吳綺莉到達拍攝現場後，與工作人員有講有笑，並笑言要請玄學家蔡興華教她如何避是非。曾睇掌的她表示算命師傅指她是男人命，屬硬朗的女人。提到卓林鎅手事件，她直言看到卓林的鎅痕不開心，起初以為是紋身，被問到卓林有否向她道歉？她說：「咁又冇，依家啲小朋友嘅發洩方法唔同，卓林係反叛期，我諗佢都覺得今次唔係咁好，我哋冇再深入討論。（鬧佢？）唔開心，都有嘅！」

正值反叛期的卓林，早前受同學影響而鎅手發洩。	吳綺莉強調左手手腕上的「傷痕」，是來自印度的假紋身。	玄學家蔡興華（左）提點吳綺莉可借助帶「木」的貴人令母女關係改善。

子女宮較弱

被指有份鎅手的她，笑指左手手腕上的「傷痕」是來自印度的假紋身，更爆料指為體驗年輕人發洩方法，曾試過用膠刀自殘，她說：「都真係幾痛，我第一次做人媽咪，唔識面對小朋友嘅反叛期。（同卓林傾？）冇，反而係同學校傾，佢哋話卓林情況唔算差！」此外，蔡興華指吳綺莉的子女宮較弱，可借助帶「木」的貴人，例如她的媽媽幫助令母女關係更密切。

文：影視組