葉蒨文（Sally）、譚詠麟將擔任殿堂填詞人潘源良（潘Sir）本月舉行的作品展嘉賓，三人昨日到電台宣傳，即場互笠高帽。阿倫踢爆Sally打羽毛球輕易擊敗李克勤：「佢好勁㗎，跟香港隊同國家隊操，仲打贏克勤同好多男仔。」並即時向Sally下戰書，說是學嘢！
對於劉浩龍的「污糟手論」，阿倫說：「我星期三（今日）會見到佢，會將佢隻手整污糟，我唔知佢有潔癖，見佢用衫抹汗，可能係潔癖中嘅污糟貓，同我一樣。」
