任達華療傷 談情打孖上
任達華、吳京及泰國拳霸Tony Jaa前晚出席電影首映，任達華直言拍動作戲整傷手需慢慢痊愈，要拍兩部愛情片紓緩一下。至於Tony望繼續殺入華語市場，更High爆即場騷功夫！
由影星吳京、任達華及泰國拳霸Tony Jaa主演的電影《殺破狼Ⅱ》前晚在九展舉行首映，身為投資方的太陽娛樂老闆周焯華都有現身，並與任達華言談甚歡；至於薛凱琪、劉心悠、梁漢文、許志安、錢嘉樂、曾國祥及女友王敏奕等亦有捧場，場面熱鬧！
Tony Jaa耍功夫
任達華表示今次參與打戲，受傷至左手手掌骨裂：「依家好番！醫生話冇藥可醫，要自己慢慢好，今次拍戲可以話用得最多冰，大家都受傷！（期待開拍《殺III》？）呢套等咗10年，希望5年內得啦！等我去拍吓愛情片、拖吓手仔，緩和一下先。」他表示已接下兩套愛情片，但暫時未能透露拍檔名字。問到有否跟周焯華談湊女經？他尷尬說：「恭喜晒！電影大賣，家庭又美滿，樣樣都恭喜啦！」心情興奮的Tony即興耍功夫，他表示今次與華籍演員合作愉快，希望多花時間在香港及內地發展，最想跟周潤發、周星馳等巨星合作，問到覺得自己跟子丹及成龍哪個身手最好？Tony說：「大家唔同style，好難比較。」
薛凱琪撐硬祖名
嘉賓薛凱琪對於好友房祖名傳獲內地「解封」，她即讚對方勤力：「佢有歌曲同電影點子，都會第一時間同朋友分享，寫我係佢半個粉絲啦！如果話係一個，佢會好囂。（鼓勵佢？）佢係識諗嘅人，適當嘅支持就得，講太多好似變咗媽咪。（抗唔抗拒合作？）完全唔抗拒，好耐之前佢話想拍笑片，話自己好好笑，但我覺得我好笑過佢。」
文：影視組