發哥練sing 80後開騷

柏豪：「我鍾意發哥，首先因為同性三分親，黐吓先！大家都係姓周，由細都睇佢嘅電影大，感覺好親切，佢當然好和藹可親，好似好熟嘅人咁，雖然我未見過發哥，但都希望有朝一日可以同佢合照，係我光榮嚟！」

發哥：「柏豪你都算靚仔，周氏家族有你喺度真係爭光不少喎！你做戲又得，唱歌又得，畀啲心機！」

所謂同姓三分親，發哥大讚靚仔的柏豪為周氏家族爭光！

演技了得的發哥謙虛自認唔唱得，但心思思想在80歲後開個唱。

柏豪：「發哥！我想問你咁多個電影作品中，你最喜歡邊一個作品？」

發哥：「你話自己作品呢，我都好鍾意，因為喺現場，除咗導演嗌action同cut之後嗰啲唔屬於我呢，每一個段落，action之後，個空間就係我，我好enjoy，因為個空間度只有我同啲對手係主導，無論套戲收唔收，喺現場感受係最enjoy嘅。」

自認五音不齊

柏豪：「發哥！其實你鍾唔鍾意唱歌？」

發哥：「鍾意！見到你唱歌又跳舞，我不知幾羨慕，我唱得先得o架，鬼叫我又唔唱得，五音又不齊咩，我會嘅，你等吓，可能退休唔做演員，重新搵miss chan chan、Teresa、曾路得學番十年八載，八十幾、九十歲開個concert，你慢慢等，我鍾意！」

得到前輩回答問題，柏豪大感榮幸，渴望可跟發哥真正見面：「發哥！非常之榮幸，可以同你有呢個溝通，呢個接觸，非常之開心，雖然我哋未親眼親身溝通，但透過呢個訪問、《東網》咁樣溝通，我覺得係榮幸！個個都野生捕獲發哥，我都希望我可以工作中捕獲發哥，希望有機會同你影相，希望可以見到你，多謝發哥！」

文：陳偉立

採：龔凱欣、黎寶倫

攝：秦健輝、林定兒、李柏儒