子丹遭張晉揮刀劈爆鼻
「宇宙最強」甄子丹與前重量級拳王泰臣合作的新片拍得如火如荼，繼泰臣早前手指骨折後，子丹前晚亦被張晉以詠春八斬刀劈中鼻樑，傷口爆缸濺血腫瘀，眾人大為緊張即時停機，子丹反而只擔心傷口未能銜接所拍下的鏡頭，還安慰超級內疚的張晉，昨日更火速繼續開工。
由袁和平任動作導演的新片《葉問3》，近日集中拍攝埋身肉搏場面，所謂拳腳冇眼，繼早前子丹不慎傷及泰臣手指骨導致骨折後，前晚子丹亦鼻樑爆缸，他上載相片時卻搞笑留言：「不是泰臣咬的！」一於幽泰臣一默！
降龍伏虎有代價
前晚拍攝一場張晉挑戰子丹戲份，兩人均以詠春八斬刀互片，他倆持刀貼近面部連環攻守，張晉要飛身刀劈子丹正面，未料不慎劈中子丹鼻樑，張晉即時撲前慰問，又用消毒噴霧為子丹消毒，子丹的鼻樑傷口爆缸流血，附近皮肉亦開始腫瘀，令眾人大為緊張，丹爺卻邊敷冰邊笑謂：「降龍伏虎是要有代價，拍功夫片傷係難免，我反而擔心鼻傷會同之前拍嘅鏡頭唔連戲，阻礙進度。」
證明各人都賣力
拍片多年丹爺傷患無數，自言今次實屬小傷，他說：「好似之前同泰臣交手，佢食指都因為錯位，意外畀我拳頭撞到骨折，所以冇得避免。張晉都唔想發生，另一角度睇，證明每個演員都好搏命，賣力打到最好。」休息一晚後，昨日他亦火速繼續投入拍攝。
不過「兇手」張晉卻十分內疚：「互斬時速度好快，每一刀都好貼面，喺千分之一秒嘅時間，我把刀斬到子丹塊面同個鼻，好唔好意思同內疚，但子丹好爽朗咁笑吓，仲安慰我，令我更加唔好意思！」張晉亦試過被對手所傷或者錯手傷人，無法預防，惟有加倍小心，以免傷人傷己。其妻蔡少芬昨日亦表示相信老公心情不好受，同時希望子丹盡快康復。
此外，《葉》片一眾演員包括子丹、泰臣、張晉、熊黛林、吳千語將於本周六（13日）亮相上海電影節開幕紅地氈。
文：影視組