任達華吼實最佳動作掌
【陳栢宇澳門直擊】一眾型男任達華、吳京及Tony Jaa等昨晚「空降」澳門銀河酒店，會合導演鄭保瑞及監製黃柏高出席新片《殺破狼II》全球首映禮。圍觀粉絲不停要求握手及影相，場面相當墟冚。而身為投資方兼剛再次榮升父親的周焯華在活動尾段亦有現身支持。
一身「白馬王子Look」現身的任達華，孖住吳京做訪問，先來一招「賣花讚花香」，指《殺》片如同十年磨一劍，暴力血腥卻不失溫情，叫大家多多捧場。戲中交代他不惜自毀手掌保命，與吳京齊齊殺敵，難怪吳京打趣：「我點搏命打都冇用，點都唔及『華手』搶鏡。」任達華聞言即補充：「應該可以攞『最佳動作手獎』。（票房好再拍續集？）吳京話想再拍佢嗰套《戰狼II》就真。（父親節點慶祝？）所有嘢畀晒母親節啦，我同囡囡玩騎膊馬最開心。」
Tony Jaa傷腳踭
首次到訪澳門的Tony Jaa以一口流利廣東話向觀眾打招呼，又擺甫士任影唔嬲。他大讚澳門粉絲熱情，不過由於行程緊逼，相信不會留下遊玩。當問到拍戲時有否受傷，他坦言：「拍戲在所難免，今次傷勢集中喺腳踭。」