江若琳花7位數律師費捱飯盒
藝人江若琳（Elanne）去年與前經理人公司鬧出合約糾紛，她昨日表示事件至今仍未解決，已經花了七位數字律師費，亦預了辛苦賺得的薪酬都用來賠償。她謂自己賺的每一蚊都有血有汗，幸好已習慣難關且很知足，只求開心便夠。
江若琳昨日出席「天梭表衝破極限挑戰賽」活動，同場還有新一代男神王宗堯、邵仲衡及混血女模Lea T.等。Elanne表示會跑畢全程兩公里，平日她也有跑10公里長跑，夢想是參加三項鐵人賽。
猶幸仲有飽飯食
與前公司有合約糾紛的Elanne談到目前的工作狀況時說：「o岩岩o係天津返o黎，拍完第五部電影。（賺好多？）你話律師呀？唔係，自己經歷o左咁多，知道人生充滿未知o既挑戰，要努力賺錢。（賺o黎賠畀前公司？）預o左，件事已經一年，畀o左空間我，我已經忙到唔記得o左呢件事，大家都同我一齊忘記，件事唔知幾時先完結，我已經放得開，煮到埋o黎就食。（至今律師費畀咗幾多錢？）七位數字，每一蚊都有血，我已經習慣難關。（自己有冇飽飯食？）多謝大家關心，我飽o既，我個人好知足，一個飯盒已經可以餵飽我，我唔係求o的咩，開開心心就夠。」
王宗堯大仔護家
而王宗堯日前踢波傷腳導致韌帶撕裂，故他盡量在不影響腳傷的情況下跑步。問到其公司是否與GME公司合併？他承認會合作：「我o地係好團結o既家庭，不過如果有人插手破壞，令到我哋身邊嘅工作人員有變動，我作為大仔o既會企出o黎保護個屋企，會同我o地爹哋（指蕭定一）講，要尊重番啲同事過去一年嘅努力，事關本身團隊已非常完善。（如果新公司幫你發展大陸市場？）大陸市場唔關一間公司事，係睇藝人o既人氣、網絡、努力同演技。張建聲、張智霖同欣宜等都有一定大陸市場，我唔擔心，我會專注香港市場。（幾時聯同其他藝人同阿一傾？）我已經反映o左，一路有溝通，不過合作性質唔同咗，點解間公司做得好要轉名？會返公司了解吓。」
文：名人組