Bobby自嘲岩巉拒見樂易玲
無綫製作資源部總監樂易玲昨日踩場出席劇集《潮拜武當》活動，就歐陽震華（Bobby）不獲無綫續約一事作反擊，她稱與Bobby方面傾續約達五個月仍未有定案，又暗寸Bobby經理人Lydia未能做到面面俱圓，記者於是致電Bobby，他聲言不需要與樂易玲見面，絕對信任經理人，並自嘲岩巉，但與經理人很夾。
歐陽震華不獲無綫續約，Bobby經理人Lydia直斥無綫高層樂易玲親口說「有啱先搵你」，樂易玲昨日於劇集《潮拜武當》的油塘宣傳活動後現身，並對Bobby的事作反擊，樂易玲謂與Bobby方面傾續約傾了五個月，惟一直沒定案，又否認無綫不與Bobby合作，對於Lydia的指控，她說：「會議細節不便透露，可能係講嗰個意念同接收者有出入，我唔覺得誤解係咁大問題。」又暗寸Lydia應面面俱圓，為藝員爭取最佳利益。
繼續斟杏兒
談到目前由另一高層曾勵珍介入與Bobby傾續約，樂易玲承認說：「藝員傾番嚟，用得最多係製作部，所以要商量，依家由珍姐傾，傾好由我哋藝員部同佢簽約。」她又說會再跟進事件。至於胡杏兒的新約，樂易玲表示仍傾談中，一直傍實樂易玲受訪的企業傳訊部副總監曾醒明最後補充指，無綫從未講過不與Bobby續約。
只想攞公道
對於樂易玲的回應，Bobby昨表示不需要與她見面，傾約由Lydia負責，但又句句反問樂易玲：「冇咩誤會，只想拎番個公道，大家都係執着呢句（有啱先搵你）。咁呢個誤會係咩意思？我都想知點解，想學吓嘢，我做到依家都想知電視台運作。（樂小姐暗寸Lydia唔夠面面俱圓？）咁咪啱，我岩岩巉巉，咪同我夾。」Bobby指Lydia與曾勵珍熟，合約將交由她們處理，Lydia則至截稿前仍未回覆。
《潮》演員楊怡表示若Bobby不續約會感可惜，而將約滿的她未考慮離巢，但想發展內地市場。錢小豪指劇集播出後，多了不少師奶粉絲，更在街上被調戲。
文：影視組