嘉玲偉仔合體晒恩愛

貴為影后的劉嘉玲，去年參與英皇投資的舞台劇《杜老誌》，有口碑之餘，亦創下41場演出紀錄，早前於《第二十四屆香港舞台劇頒獎禮》更獲得「最佳女主角（悲劇／正劇）」，認真威水！由於嘉玲一直忙碌，直至前晚才有空檔，英皇即悉心為她舉行慶功宴，並鐵定於6月6日下午6時開始，賓客方面亦限定60名，取其「六六無窮」之意，名單則全由嘉玲決定，現場筵開5席。

謝謝君豪臨場相救

一眾星級好友包括關之琳、周麗淇、鍾鎮濤夫婦和曾志偉等於傍晚時分陸續抵達，身穿性感且高貴的透視裝的嘉玲情緒高漲，整晚由老公梁朝偉陪同滿場飛。嘉玲率先於台上發表得獎感受，感謝好友與她一同分享殊榮：「舞台劇係演戲嘅殿堂，能夠得到呢個肯定我非常感動！呢個獎對於我來講意義重大，多謝英皇娛樂不惜成本地支持香港舞台劇！一做41場創下紀錄，多謝楊生重本投資，畀我哋可以有咁華麗製作，又好多謝佢今晚搞咗咁開心派對為我慶祝。」

劉嘉玲手拿舞台劇最佳女主角獎座，與老公梁朝偉恩愛在場內合照。	人緣極佳的劉嘉玲開P慶祝榮登劇后，當然一呼百應！	英皇老闆楊受成（右）與太太陸小曼（左）為嘉玲及偉仔齊齊切蛋糕。

同時嘉玲亦點名感激導演毛俊輝及謝君豪激發其潛能，對她嚴厲要求及指點，更指毛Sir對她的要求還比其太太嚴格：「初頭排戲毛Sir咩都話唔得，叫我自己返屋企諗吓點做，君豪就我有咩錯佢臨場都救到我，有佢喺度我定當好多，以後再做舞台劇我都一定要同佢合作！當然仲要多謝梁家輝啦，不過佢今日唔喺香港嚟唔到慶祝。」

於內地成立工作室

據知，英皇正計劃將《杜老誌》移師北京及上海作巡迴演出，望藉此進行中港兩地舞台劇交流，看來未來日子嘉玲理應有排忙。而與澤東經理人公司結束賓主關係兩年多的她，近日於內地成立工作室，為事業打開新里程碑，不過她仍與澤東保持友好關係。

至凌晨一時多，嘉玲、偉仔、嘉玲媽媽、梁李少霞及謝君豪結伴離開，嘉玲表示全晚玩得很高興，問到如此好成績，會否有劇癮再參與舞台劇，嘉玲笑謂：「梗係有，會再演o架！（志偉又飲醉！）係啦！哈哈！」接着便與偉仔等登車離開。

文：影視組