吳若希衝線 發哥：撈番嚟睇！
熱爆節目《我愛發哥》又返嚟喇！第11集昨日在《東網巨星》App播出，見到宅男女神吳若希（Jinny），不老男神周潤發笑言尋回年輕感覺，更說若有好劇本不介意再為無綫拍劇，發哥又說要上網撈番Jinny有份拍的電視劇《衝線》來欣賞。
Jinny：我鍾意發哥為人冇乜架子，見咩人都會自拍，我都想試吓野生捕獲發哥！
發哥：有機會！多啲坐地鐵！
Jinny：知你鍾意睇TVB劇集，咁你有冇睇過《衝線》？
發哥：唔好意思！呢套戲啱啱撞着我好忙嘅時候，要兩邊飛做宣傳，我睇過啲Promo（宣傳片）嘅，靚仔靚女又踩單車，踩到去台灣嘛！風景靚，單車衫又型，總言之型仔型女，青春劇。大家都希望有青春，我都希望有青春，好似陳寶珠舊時隻歌咁：「青春，真可愛青春！」好睇嘅呢套劇應該，我第時喺網度撈番嚟睇，先再答你！
Jinny：發哥會唔會返TVB拍劇？如果會我就全力自薦，希望自己可以同你做對手戲！
有意拍無綫劇
發哥：唔知返嚟可以拍啲咩喎！佢哋又冇Approach我喎！如果有好劇本我都唔介意，但啲時間呢，就唔可以捱咁長，12個鐘頭內我都頂得順嘅，希望佢哋有好劇本搵吓我，不過都要太太同意先得。（Jinny：好好呀，發哥好錫屋企呀！）
得到發哥的神級回覆，平日已愛笑的Jinny更加笑到見牙唔見眼，繼續鍥而不捨諗計想同發哥合作，她說：「好搞笑發哥！原來佢講嘢係咁樣o架，佢仲話上網撈番《衝線》嚟睇喎，好多謝發哥！你快啲返嚟拍劇啦，我哋都好想同你學吓嘢。你覺得咩為之好嘅劇本呀？不如你諗一個幾好嘅角色出嚟，我咪可以同公司講，公司咪可以開，我哋咪可以合作囉！」
文：陳偉立
採：羅宛君
攝：秦健輝、李廣成、劉斌