鄭嘉穎約陳凱琳：咪大驚小怪

藝人鄭嘉穎、陳凱琳、陳嘉寶、陳瀅、何雁詩、劉佩玥等前晚出席劇集《殭》煞科宴，身為主角的嘉穎，聯同謝安琪及監製陳維冠埋單，眾人皆大歡喜。戀情萌芽中的嘉穎與Grace，未知是否因女方返加拿大小休思念非常，故一見面即談個不停，更應記者要求大方合照，期間兩人面對面時，Grace更一臉冧樣，嘉穎則笑到四萬咁口，顯然見到「女友」心情大靚。

仲有機會合作

剛剃了鬍鬚的嘉穎，透露去年底為角色留鬚，如今因完成劇集而剃掉，為的是帶來不同感覺，更指該劇乃從影以來拍攝最長的一套劇，問到有否不捨得Grace？嘉穎笑謂：「我哋拍完劇都仲係朋友，同無綫又未滿約，仲有機會合作，（拍完劇後單獨約對方？）有分數啦！總之會出嚟食飯，小弟之後要返大陸拍劇，食吓飯先啦，之後再去做嘢。（合照唔尷尬？）多謝關心，總之見到食飯時唔好大驚小怪啦！」

右起：劉佩玥、陳凱琳、何雁詩與陳瀅四個女仔又碰頭。	《殭》眾演員齊齊食煞科飯。	嘉穎與Grace戀情進入白熱化階段。

開綠燈任接送

而Grace則表示與劇組相處4個半月，實在感不捨，更指以往多拍長劇，對上一次拍攝《張保仔》花了5個月之久，更謂：「最唔捨得係我啲朋友，尤其去完荷蘭之後同Anjay（陳嘉寶）、Winki（賴慰玲）都好好朋友，（咁嘉穎呢？）同大家都好好朋友，之後會再約食飯，（嘉穎單獨約你會唔會應承？）都可以約出嚟食飯，（約咗未？）未，大家都忙緊其他嘢。」Grace笑言親戚也有跟進二人新聞，問到煞科宴後可有人送她返家？Grace表示會坐的士離開，那嘉穎有否載過她？Grace謂：「我諗佢有司機，佢好少揸車，（如果佢兜埋你？）如果順路一齊載埋都冇嘢嘅，朋友載朋友都唔係好大件事。」

至於同場的陳嘉寶對早前有狂迷「送」智慧齒，她表示已驚完，更指曾被影迷跟蹤，之後已加強意識，回家時長期手執電話，以便隨時報警，又或者與男友、朋友傾電話。

文：影視組