發哥驚鄧麗欣跟小方食唔飽
昨日在《東網巨星》App播出的第八集《我愛發哥》，輪到女星鄧麗欣（Stephy）向男神周潤發舉手發問，期間發哥語出驚人，竟笑指Stephy男友方力申珠圓玉潤，相反Stephy則奀挑鬼命冇啖好食，勸她要搞好婆媳關係！
Stephy：「我愛發哥因為佢專一，咁多年都冇咩緋聞，對老婆非常專一！所以我好愛佢。另一樣係佢好有毅力，而且佢好鍾意運動，又鍾意行山，呢份毅力好值得後輩學習。」
發哥：「你好大投資吖，成隊嘢（排球隊）出嚟，仲做埋領隊同教練，真係冇得頂！我覺得小方同你一齊係佢嘅福氣。（Stephy：我都覺呀！）你睇吓佢，珠圓玉潤。（Stephy：發哥都話你肥呀小方！）你照顧佢都辛苦，瘦咗咁多，佢就愈來愈肥仔，佢做多啲運動減吓肥，Paco見到我，我都話小方好有眼光，不過我上次見到佢同阿媽兩個人陰啲陰啲慶祝伯母生日，佢兩個好恩愛，你小心啲，行多啲外母（奶奶）政策，我見你咁奀挑鬼命，佢兩個匿埋自己食唔畀你食，所以餓到你咁瘦。」
最愛廣東道街市
Stephy：「你多數會喺邊個街市出現？我都好鍾意行街市，如果喺街市見到發哥就好喇！」
發哥：「拿！香港街市有好多，但我唔去香港嗰邊，多數喺九龍，北河街、桂林街、鴨寮街多嘢睇，我一落深水埗就會去掃街，然後九龍塘行去九龍城又好近啦，有時行開旺角街市會上去市政大樓吔粥，個豉油王炒麵都唔錯！最有特色係廣東道，因為我細個喺砵蘭街住，當時成日同外婆買餸，有好多回憶，因為廣東道街市好長，朗豪坊一路行到上海街，去埋官涌街市。去街市好開心，想食咩買咩都有！廣東道嘅街市係我至愛呀！」
Stephy聽罷發哥的回覆不禁高興大笑，並說：「好開心發哥答咗我問嘅問題，首先我覺得佢好英明呀！佢覺得小方好肥啦，我好瘦啦！就係佢食晒我啲嘢！其實係真，搞到我冇啖好食呀！講笑啫！發哥又講到廣東道係佢最喜愛嘅街市，我會去多啲，試吓可唔可以野生捕獲佢，同感受吓嗰種街市嘅感覺係點！」
文：陳偉立
採：衞紫敏
攝：秦健輝、張福宏