黃家強:唔想違背良心
葉世榮近日有意將Beyond合體，奈何黃家強與黃貫中（Paul）關係勢成水火，家強接受專訪時表明堅拒與對方同台，揚言二人緣盡於此。Paul亦透過經理人隔空還擊：「我唔會避，冇做錯事，我唔係賊！」
本報早前獨家披露世榮有信心令鬧不和的家強及Paul破冰，Beyond樂隊三位成員有望於年底假紅館開騷紀念已故成員黃家駒。家強日前在電台訪問稱「Beyond冇可能重組」，昨日家強接受本報專訪時，透露開騷有轉機：「個電台訪問係較早前錄音，當時係覺得冇可能重組，但今次世榮有call我，希望幫家駒搞紀念活動，邊個搞我都會支持，更何況係世榮。（畀面世榮同家駒？）可以咁講。」
家強畀面世榮
家強表示考慮出席紀念騷，一切視乎世榮的計劃，周內將會和對方見面詳談。但家強直言介意與Paul同台演出：「我會介意，我勉強唔到自己，我唔想違背良心做。（怕再有是非？）同台呢件事唔發生就唔會有是非，我唔係嬲佢，只係覺得緣盡，已經係過去式，我冇必要重蹈覆轍。我唔會再向前一步，我哋緣盡於此！」
家強又稱曾努力去挽救關係：「可能係寵壞啦，我太過唔計較，咩都吞聲忍氣，但只會助長佢令事件去到咁極端，一發不可收拾，無謂浪費大家時間。我忍受到雜誌亂寫嘢，但我忍唔到佢亂講嘢，仲要夾埋人哋亂講嘢。」
Paul：我唔係賊
對於家強的指摘，Paul透過經理人王斌回應：「唔介意，把口生喺人哋身上，Paul唔係小朋友，大家成年人，唔會咁容易受傷。（會避家強同台？）Paul唔會避，冇做錯事，Paul唔係賊。」他又指Paul是個坦蕩蕩的人，很樂意以Beyond身份上台。
身在北京的世榮昨接受電話訪問，提到家強介意與Paul同台，他稱：「等我返港再同佢哋傾，有信心說服佢哋。每人有唔同睇法，對佢言論唔發表咁多啦，希望大家放下成見，正如佛偈所講『善巧方便』。」
文：音樂組