趙世曾打波式正打氣

趙世曾為公司旗下籃球隊出賽，鮮有出席公開場合的兒子趙式正（Roman）亦有撐父親場，他坐在觀眾席為父親打氣兼拍掌。趙世曾在比賽中不時落力進攻兼充當領袖角色，狀態大勇，球隊最終奪得亞軍。打了十多年籃球的他表示半年前成立球隊，經常作賽：「每個星期會打兩日，因為運動量多，同一班人開心吓。（女友們平時有冇撐你場？）今日比較忙，間中都會嚟。（Roman有冇一齊打籃球？）佢比較鍾意健身同打泰拳，我都有鼓勵佢打。」