星粉祝福 賀巨星「登六」：我愛發哥
今日5月18日是一個特別日子，大家請說一句：「Happy Birthday！」因為60年前的今日，一個屬於我們香港的巨星誕生－周潤發，在發哥60歲大壽的日子，《東網巨星》特別邀來25位80、90後的歌影視偶像，包括容祖兒、謝安琪、蔡卓妍、鍾欣潼、佘詩曼、吳若希、陳嘉桓、周秀娜、周柏豪、薛凱琪、任賢齊、張繼聰、黃翠如等齊聲高呼：「我愛發哥！」他們又逐一細說愛發哥的理由。
《東網巨星》亦在今天啟播特備節目《我愛發哥》，緊接的個多月，逢星期一至五，我們的巨星周潤發會破天荒現身，接受25位紅星的發問，發哥的回應更盡顯其風趣幽默作風，令人會心微笑。
眾星更會在節目中，在發哥「登六」的特別時刻向他致敬，也會回顧發哥從影40年來嘅趣事、成就、獎項等軼事，絕對不容錯過，亦肯定是城中話題所在。只要你有《東網巨星》App睇實《東網》，緊接的個多月，發哥就會日日陪住你。
容祖兒
「我愛發哥，我愛發哥……夠靚仔，鍾意發哥心地好，又親切，有求必應！」
蔡卓妍
「我愛發哥，鍾意發哥嘅幽默感，好鍾意睇佢做訪問，全部都好好笑，佢嘅演技我亦非常鍾意，真係做乜似乜！」
鄧麗欣
「我愛發哥，因為佢對老婆專一，咁多年都冇咩緋聞！佢又好有毅力，無論事業上、人生、生活上都係。」
Janice Man
「我愛發哥，好鍾意發哥親民，唔理會其他人目光，好有自己獨特個性，好值得我哋後輩學習。」
張繼聰
「我愛發哥，問過好多老前輩，打探發哥當年拍劇嘅往事，得到嘅係一致讚美，佢可以令拍攝氣氛好開心，每個人喺冇壓力下發揮，果然係一級演員。另外佢喺《秋天的童話》演船頭尺有句對白係我座右銘，就係『自己Happy咪得，使乜理人？』」
鍾欣潼
「我愛發哥，有次我搭的士準備落車時，等的士嘅咁啱就係發哥，佢幫我開車門，好禮貌又對住我笑。我又鍾意睇佢嘅戲，所以好鍾意發哥！」
陳嘉桓
「我愛發哥，發哥你好！我都好想見到你，好想同你瘋狂自拍呀！我細細個就睇你嘅戲，我好鍾意《秋天的童話》你個角色o架！」
黃心穎
「我愛發哥，好欣賞發哥好錫老婆，佢係Super Star，但依然好親民，對我哋後輩係好榜樣。」
黃美棋
「我愛發哥，發哥咁得人鍾意因為佢親民，我細個開始拍戲儲咗好多相，就係差發哥未儲到！」
岑麗香
「我愛發哥，發哥我鍾意你成日搭港鐵，又去街市買餸，呢啲係真人會做嘅嘢！」
佘詩曼
「我愛發哥，發哥演咩角色都入型入格，好細緻嘅位都做得好好！真係好難！我覺得發哥好勁！」
薛凱琪
「我愛發哥，發哥演文藝片又得，演笑片都得！笑片難拿捏好多，佢係好出色嘅演員，同埋好Nice，好親民！」
張敬軒
「我愛發哥，我鍾意發哥嘅瀟灑、霸氣、生活中嘅親和力，私底下同發哥相處最鍾意佢嘅智慧，亦好博學。」
周柏豪
「我愛發哥，鍾意發哥，首先因為同姓三分親！由細到大都睇佢嘅電影，感覺親切！」
鄭俊弘
「我愛發哥，記得有次喺銅鑼灣食飯撞到發哥，我O住嘴望佢，但佢笑容親切，仲指住我好似識我咁打招呼，令我個心好甜！」
李思捷
「我愛發哥，最鍾意發哥演喜劇嘅Timing，好準！佢好睇之處係靚仔，演追女仔戲特別好睇，加埋佢演喜劇嘅方法，成件事好自然！」
黃翠如
「我愛發哥，最鍾意發哥，任何造型都鍾意，就算隨便喺屋企行出嚟都咁型仔！」
Heidi@SuperGirls
「我愛發哥，我鍾意發哥和藹可親，有次行街撞到佢，我望住佢，佢笑住望番我，見到途人搵佢影相都一一應承！」
張兆輝
「我愛發哥，發哥曾經教我影相，教我點捕捉景物，仲會講出我嘅優點同缺點。」
吳若希
「我愛發哥，我鍾意發哥冇乜架子，見咩人都會自拍，我都想試吓野生捕獲佢！」
鍾嘉欣
「我愛發哥，睇過發哥訪問，當中話過佢會將所有遺產送畀慈善機構，好佩服你！」
周秀娜
「我愛發哥，我愛發哥型英帥靚正！我鍾意發哥會去買餸，好親民，同埋會搭港鐵！」
許廷鏗
「我愛發哥，好欣賞發哥親民，冇架子，佢身為天王巨星，都可以咁親民，好難得！」
任賢齊
「我愛發哥，發哥係我偶像，佢演嘅好多角色我都好鍾意，個人又Nice！」
文：陳偉立
攝：攝影組