朱慧敏眼濕：都唔係第一次
最新一期《好報》獨家披露彭懷安（Eddie）背未婚妻朱慧敏偷食「長腿G.E.M.」！「兩公婆」昨午齊齊潛水，至傍晚Eddie終在網上發文認衰，坦承生活不檢點並會改過；朱慧敏昨晚拍劇見人時強忍淚水，並直言：「類似嘅事已經唔係第一次發生！」
前EO2成員彭懷安（Eddie）年初求婚成功，並定於明年結婚，惟未迎娶朱慧敏，Eddie已經身痕！昨日最新一期《好報》踢爆Eddie背未婚妻夜會索女後，「兩公婆」昨日整個下午都未有接電話及回覆短訊，至傍晚六時許，男方終於放棄「潛水」，在Facebook及微博發文，坦承自己生活不檢點，向「老婆」認錯：「其實每次發生此類事件，都要Queenie（朱慧敏）為我作出回應，作為未婚夫的我，實在深感抱歉。」又自稱唔生性，辜負對方給予的信任：「Queenie對我亦百分百信任，但被拍到此類令她尷尬的照片，已經不只一次。」最後他作出「從此以後我會檢點」的承諾並再次道歉：「這次令各位關心我們的朋友擔心，在此說聲對不起，這對不起，更特別是要對Queenie說。」
未知會否影響婚期
而朱慧敏就一直無聽電話，對於Whatsapp的提問只回應了一句：「多謝關心，私事唔回應。」至昨晚9時許，她單拖現身劇集《愛‧回家》拍攝現場，在場記者蜂擁而上，期間有記者與保安發生衝突，她更充當和事老。問到對未婚夫「偷食」事件的回應，她就表示深入回應留待稍後公布：「睇吓一齊回應定分開回應啦！今日有同監製交代呢件事，但係我都會收拾心情埋位拍嘢！」她更強忍淚水，眼濕濕說：「我係一個專業演員，而《愛‧回家》畀咗好多機會我，我都想劇中嘅馬壯（黎諾懿飾）同尹德如有個好結局！」她更神情嚴肅地表示：「類似嘅事已經唔係第一次發生，要交畀男方自己面對，向公眾交代。」而問到事件會否影響婚期，她亦謂稍後作回應。
約會索女借宿一宵
事緣上月4日凌晨2時許，Eddie被《好報》拍到晚上到北角約會索爆「長腿G.E.M.」，伊人更翹實Eddie過馬路，相當親熱，二人再到便利店買白酒加綠茶，期間女方更以手輕摸Eddie面珠，之後齊齊上女方香閨，直至翌晨都未見離開；隔日Eddie即扮乖與朱慧敏及家人到青衣揀金飾，之後二人再到北角再揀金器，全程十指緊扣，期間更邊行邊攬，表現細心又sweet爆，Eddie還做「柴可夫」送未婚妻回住所，完全不着「偷食」痕迹。
文：專案組
攝：追蹤組