Beyond破冰年底開騷
殿堂級樂隊Beyond成員黃家強與黃貫中（Paul）近年水火不容經常在網上留言「互片」，家強早前大爆Beyond解體是Paul不想養世榮，寡言的世榮終打破沉默揚言沒放在心，卅多年兄弟情穩如泰山，為延續家駒精神，將以發起人身份年底在紅館舉行「紀念家駒慈善騷」並聯絡兩位兄弟，繼2008年後，冰封七年的三子終破冰再「合體」演出。
樂壇班霸Beyond的歌迷一直渴望黃家強、黃貫中（Paul）及葉世榮三子再「重組」，奈何家強與阿Paul近年鬧出不少是非，令三子合作無望，惟眼見最近有人以家駒之名舉行紀念演唱會，卻不明當中意義，未有明確宣揚家駒所發揚的精神，令世榮有感而發，必須打破慣性沉默，為家駒盡一分力。世榮說：「因為近日網上有人發起在家駒生忌當日舉行紀念演唱會，覺得籌備得好草率，與其由不熟悉家駒精神的人來搞，倒不如我做發起人為家駒真真正正做一場慈善騷。」
有信心做說客
對於能否說服家強和阿Paul冰釋前嫌再度合體，世榮表示很有信心：「我明白重組要有好多因素，反而重聚搞一場有意思嘅演唱會應該問題不大，我知道歌迷好有需求，好想見到我哋可以一齊做show，Beyond雖然解散咗，都唔可以用家駒名義立亂搞活動，所以我更加要着手將年尾搞演唱會嘅計劃實踐。」
提到家強和阿Paul的水火不容，世榮卻絕對有信心說服兩人，只要打出為家駒出一分力的牌頭，他認為兩兄弟所有恩怨都會即時放低，他說：「我覺得佢哋有咩成見都會放低，大家會努力做好呢個騷，喺我心中，家駒從來冇離開過，好想藉住演唱會帶出家駒愛心精神，等年輕一代知道咩係包容同愛！」世榮透露除了三子更會邀請舊隊員，以及同期的樂隊太極、達明一派及草蜢任嘉賓，他說：「我希望可以做到一個派對形式，熱熱鬧鬧一齊去懷念家駒，繼續去發揚佢嘅精神。」
後生口不擇言
最後世榮更首度開腔回應，談及家強爆阿Paul不想養他的傳聞，他強調從來沒有將此事放在心上，亦不會去深究阿Paul是否有說過，他說：「後生嘅時候個個都會口不擇言，個個都好多嘢講，我都好多嘢講，有時講咗傷害人嘅說話自己都唔知，成件事係家強話阿Paul咁講，到底係咪真係有咁講過，我覺得唔需要去追究囉！我哋卅幾年感情，點會為呢啲事去摧毀呢。」力證兄弟情從來沒有為是非而動搖。
文：音樂組