呂慧儀操fit追女炮製「蟹籽沙律」
藝人呂慧儀（長腳蟹）與老公黃文迪齊齊擔任纖體代言人搵奶粉錢，長腳蟹既谷胸又騷腿，老公就大騷肌肉。長腳蟹盼儲奶粉錢再造人，本身育有兒子「蟹籽」，希望生女叫「沙律」，湊成一客「蟹籽沙律」！
藝人呂慧儀（長腳蟹）去年誕下金叵羅「蟹籽」BB後，工作減產，日前終於復出，孖住老公黃文迪齊齊搵銀，以纖體代言人身份拍攝硬照，第四年擔任纖體代言人的長腳蟹谷胸上陣，身材明顯fit爆，換上多套的性感服裝示人，低胸的桃紅色晚裝及白色的短褲套裝，既騷豐滿上圍，又晒白滑長腿，而身為模特兒的老公更大騷肌肉，教老婆擺姿勢，實在是「模範夫婦」。
餵人奶增磅
長腳蟹透露因要餵人奶，故之前休息照顧「蟹籽」，老公又要幫忙照顧，令二人增磅不少，因而得到纖體的工作。問到這次以夫妻檔上陣，是否酬勞高？二人透露酬勞有6位數，幫補奶粉錢。
老公拖到實
長腳蟹穿上高跟鞋，老公就全程拍攝時都小心翼翼拖住長腳蟹，更十指緊扣。提到二人大晒恩愛，羨煞旁人，長腳蟹甜笑並謂：「由拍拖到依家，我哋都係咁sweet！」提到二人會否再「造人」？她直言：「想生多個女，咁就可以囝囝叫『蟹籽』，囡囡叫『沙律』。」而老公亦表示要計劃一下。
文：名人組