鄺美雲忙碌是福

從港姐、歌手轉型為珠寶商的鄺美雲（Cally），自淡出娛樂圈後，便全心全意投入到珠寶世界，不但親身到美國修讀珠寶鑑證文憑課程，更考取了美國寶石學院的GIA研究寶石學家文憑的專業資格。她於2000年創立自家珠寶品牌，去年更與太陽集團合作投資拍賣行，出任珠寶及鐘錶部董事，走訪各地為拍賣行搜羅珍品，成為不折不扣的女強人。

Cally對珠寶如此着迷，除了因為女人天生愛美的天性外，亦因為珠寶能帶給她歡樂。她說：「因為大家嚟買嘢都係為喜事，可能係為求婚、去ball、做禮物等等。因為珠寶唔係必需品，係有多餘錢先至會嚟買，係另類嘅投資，買咗之後唔單止可以戴，而且會隨住時間升值。」Cally坦言自己年輕時不懂得欣賞珠寶的美，至大概30歲時才開始迷上它：「我以前做歌手，多數都係戴custom jewelry，因為唔怕唔見。不過其實一啲都唔平，一條頸鏈都要成幾萬，講緊嘅係十幾年前喎！不過呢啲鏈，隔咗幾年唔戴再拎番出嚟，個樣就會變到好可怕，唔可以再戴。如果我當年買真嘢，放耐咗可能升價十倍都唔止！」

眼光獨到的Cally，投得的首飾往往會升值四至五倍。	相信小病是福的Cally，趁在家中休養時陪伴愛犬。	「女強人」Cally視「忙碌」為生命的營養劑。

買珠寶升值四五倍

Cally表示於拍賣市場競投珠寶，除了考驗買家的眼光和品味外，緣分及運氣亦相當重要。她笑言自己運氣相當不錯，常以低價投得心頭好：「我朋友成日都講笑咁話：『真係好奇怪，你每次一舉手，其他人都好似畀人點咗穴咁，冇人同你爭』。我最記得有一次拍賣，有兩隻同一個系列嘅復古鑽石姊妹錶，無論款式、石嘅重量都差唔多。我以五、六萬蚊左右嘅低價拍到一隻，但係到拍下一隻嗰陣，啲人好似醒咗咁，結果要十八萬！」而她更自爆曾買下不少珠寶，十多年後再拿出來拍賣，結果升值四至五倍！

從拍賣行常客變成拍賣行董事的Cally，當然格外明白買家的心態及需要，她除了會建議有意競投的顧客先看一看珠寶的實體、為他們提供相關珠寶的資料外，亦會給他們中肯的建議。Cally表示自己做人的宗旨是要做到「四給」，給人歡喜、希望、信心及方便，她續說：「一定要拎個心去對客，同畀中肯意見。要分析畀個客知邊隻靚啲或者襯佢啲，同埋要講番喺投資上嘅價值係點。而且都要睇能力，唔係話邊樣貴就推介邊樣，要知個客嘅需要同鍾意啲乜。」

工作必須全情投入

她表示做工作必須全情投入，要專業、用心，並懷着感恩的心。她說：「我好開心可以做到自己鍾意嘅行業，以前鍾意唱歌，可以出唱片。依家鍾意珠寶，又可以做到同珠寶有關嘅工作。我成日同自己講，唔好怕忙同辛苦，忙都係營養，幫自己加油。」為了籌備於本月十七日舉辦的拍賣會，Cally一直忙個不停，更因休息不夠而咳了足足一個多月，但Cally並沒有怨言，反而相信小病是福：「可以乘機休息三、四日，陪吓我嘅愛犬。幸福係自己畀自己，咁個人會比較開心同正面。其實要忙都唔係咁易o架，證明人哋信任你、喜歡你，先會搵你做嘢。」

冇時間應付感情事

而忙得不可開交的Cally，坦言目前感情生活空白，只抱着「既來之，則安之」的態度。她說：「我身邊啲朋友成日話我冇理由冇人追，我覺得係有人欣賞我嘅，不過冇人行動囉。有人欣賞自己都好好，唔一定要拍拖，當然有我都唔會抗拒。」Cally形容自己是一個比較傳統的女性，認為感情事必須由男方做主動，並說：「啲人成日話『女追男，隔層紗』，我從來都唔相信呢件事，由女仔主動嘅話，就算追到，個男仔都未必會珍惜。雖然感情係要相向，但係始終男仔都係應該勇敢啲追女仔。不過我唔急，因為自己好忙，冇時間去同人培養感情。因為拍拖都需要幾多時間去了解對方，所以我認為自己暫時唔需要感情住。」

鍾愛大顆綠寶石耳環

Cally花盡心力去籌備太陽國際拍賣行2015年度春季拍賣，並將於本月十七日假香港四季酒店舉行，呈獻逾350件珍品。一眾藝術愛好者更可於本月十五及十六日到四季酒店預展現場，先睹為快。Cally透露在芸芸拍賣品當中，她最喜歡重36.43及39.51克拉的「綠寶石耳環」，她說：「我咩都鍾意大粒，加上好難搵到兩粒形狀同顏色咁近似嘅綠寶石，好珍貴！」

採訪：龔凱欣

攝影：劉斌