范冰冰女王駕到
一年一度有「時裝界奧斯卡」之稱的MET Ball早前在美國紐約舉行，並以「中國：鏡花水月」為主題，出席的每位都是巨星，包括樂壇天后Beyonce、Lady Gaga、Katy Perry、內地女星章子怡、范冰冰及劉嘉玲等，紅星雲集，位位都盛裝上陣。時裝作家Janice大讚范冰冰最艷壓全場，指她懂得配合主題，以金裙外披中國風的斗篷現身，好有女王風範，甚懂穿衣之道令外國傳媒留下印象。
范冰冰
「好靚好有女王風範，同主題好貼切。佢之前喺康城影展已經着過龍袍等中國風嘅服裝，今次造型比以前更靚，駕馭得起，中西式元素得到平衡，佢懂得點樣穿衣去突出自己，令人留下印象，絕對係艷壓全場。」
Lady Gaga：奇怪黑武士
「令我想起星球大戰嘅黑武士，雖然有啲奇怪，但Gaga向來都係以奇怪突出造型示人，所以今次個造型唔算太吃驚，不過喺群芳中亦唔可能殺盡全場。」
章子怡：清雅民國look
「好有民國女子感覺，清雅簡潔。拖尾裙襬係西方元素，而上身領口係以旗袍款式打造，中西融合一齊，亦巧妙地襯以紅色珠寶，低調得嚟有睇頭。」
Beyonce：過分暴露
「好似裸體上陣咁，唔適合呢個場合。雖然條裙好靚，寶石鑲嵌嘅手工好仔細，不過出席咁大型慈善晚宴，就有少少唔尊重場合，適當性感係可以，但呢個造型過分暴露咗。」
劉嘉玲：超現實女俠
「條裙嘅品牌係1930年代出名以超現實主義成名，今次畀嘉玲着呢條裙都係充滿超現實元素，黑色位置有斗篷嘅效果，好有女俠感覺，同時亦都好高貴。」
Katy Perry：玩味型格
「非常型格，晚裝裙印有pop art圖案，好有玩味感。Katy向來都有時尚觸覺，今次仲以充滿星際女戰士嘅手套配搭，喺穿衣方面拿捏得好好。」
Profile
時裝作家王麗儀（Janice Wong），是16年前華語媒體中首位遠赴歐美時裝周報道的時裝編輯。她經常為香港及海外的時裝設計比賽擔任評判，連美國CNN旗下亞洲生活時尚網站及香港Yahoo也分別讚譽她為「香港首位真正的時裝權威」及「時裝文化人」。