黃翠如嫌廁細 難鴛鴦浴
藝人黃翠如昨日以清爽造型示人，於銅鑼灣宣傳其代言的沐浴露。而續任代言人的翠如更於台上被踢爆快與男友蕭正楠拍拖滿一周年。其後翠如受訪時大呻與男友冇時間見面：「差唔多（一周年），但我哋都要開劇，好少見面，連約一晚食飯都冇！不過都好，各自有工作，我手上有五、六個代言。」
冇噴香水習慣
談到翠如如何準備度過拍拖一周年，她搞笑揚言要送一打沐浴露給男友及其家人：「因為佢鍾意香味，佢身上仲有金梅片味！我會送埋畀佢家人。（行屋企人政策？）我哋都鍾意實用，送代言沐浴露又有埋我個樣！不過我冇噴香水習慣，（叫佢送香水？）佢送咗，但我都唔記得噴，因為我性格好男人。（同男友食飯慶祝？）我好想呀！不過到月尾都冇時間。」
儲錢換大浴缸
記者笑問翠如送沐浴露的目標是否想與男友共享鴛鴦浴，她即怕醜否認兼轉移話題：「冇呀，香港好難搵咁大個浴缸，要儲錢買個大廁所。（終極目標係玩鴛鴦浴？）係買大廁所！」談到母親節安排，翠如就直言因忙於拍劇而無法與家人食飯慶祝。
文：影視組