囝囝送膠珠鏈 千嬅唔戴怕憶子成狂
楊千嬅昨日於尖沙咀出席第四屆「薩蘭托國際電影節」，獲頒「Salento Cinema Actor Award」獎項。心情大靚的千嬅笑說：「唔敢當，覺得自己有好長嘅進步空間，可以再努力啲。」問到老公丁子高有否鼓勵她？她自爆早前與老公拍拖睇戲，但對方竟買錯戲飛：「嗰晚真係演喜劇！」她又稱母親節要工作，但囝囝已送禮物：「都係學校教佢嘅膠珠鏈。（今晚唔戴出嚟？）唔襯呀，驚你哋笑我憶子成狂。」
另外，丁子高前晚欣賞劉浩龍演唱會，他透露千嬅早前患氣管敏感，問到千嬅有否遷怒於他？丁子高默認說：「我都好就佢，佢係全職湊仔媽咪，朝早送囝囝返學，之後又開工，每日只有三、四個鐘休息。」曾表示今年再造人的他又說：「佢未畀期我呀。（唔驚做高齡產婦？）唔驚，我覺得係天意，順其自然。」
