周家蔚幸福媽媽攬實兩寶貝

剛榮升第二任媽咪的周家蔚今日會留在家中過母親節，直言兩名小寶貝已是最佳的禮物，又大爆「哥哥」對新生弟弟痛錫非常。至於身為家蔚兒子契媽的佘詩曼，則被母親大爆送樓送車作為母親節禮物，認真孝順！

周家蔚早前剛誕下二子洪竟琋（JT），教洪家上下高興不已，小JT還趕及「會合」哥哥大仁，與媽媽齊齊慶祝今年母親節。由於還在坐月關係，家蔚表示會留在家中，與媽媽及奶奶食飯，家蔚說：「攬住佢哋兩個已經係最大嘅禮物，希望佢哋健康成長，將來嘅嘢就隨佢哋自由發揮啦。」

她又透露大仁天生是位好哥哥：「佢好錫細佬，喺醫院第一眼見到BB，就好sweet咁叫細佬，我見到好感動，真係喊咗出嚟。依家佢又會叫細佬食奶，又成日走去睇住BB。」家蔚又表示細仔好食得，經常相隔個多小時，便喊着要喝母乳。

至於身為家蔚兒子「契婆」的佘詩曼媽媽Lily昨出席兒童慈善午宴，一頭白髮相當搶鏡的Lily，接受訪問時更自爆：「係遺傳嚟嘅，我30幾歲就開始染髮，依家冇染變白晒，朋友仲以為我特意去染，阿佘遲吓應該都會同我一樣，佢12歲就有第一條白髮。」

談到母親節，Lily甜笑指阿佘送禮相當豪爽：「上年送咗層村屋畀我做母親節禮物，前年就送車。我以前湊仔好辛苦，依家係收成期囉，人生去到我咁，最緊要係過得好。」她又表示會與兒子及阿佘去食日本菜慶祝一番。

文：影視組

周家蔚幸福媽媽 攬實兩寶貝