蔚雨芯搣o靚味樂做光頭妹
年僅21歲的「魔鬼胸」蔚雨芯（Rainky）於歌壇失意時，卻憑性感形象為自己帶來另一條出路，演藝之路不易行，幸得家人一路上的支持和鼓勵，令她得以努力向前。最近演出古裝劇《末代御醫》的她，不想局限於做細路女角色，她表示願向高難度挑戰，就算要剃光頭也在所不惜！
走捷徑 無悔出寫真
蔚雨芯（Rainky）三年前以歌手身份入行，年紀輕輕的她深明在歌壇立足甚艱難，入行初期亦有失意時：「依家樂壇愈嚟愈萎縮，淨係單靠唱歌會好難行，以前好畀心機唱歌但冇人賞識，係有灰心過，嗰陣公司仲花咗好多錢幫我拍MV，又搵埋出名嘅排舞師同我排舞，但回報往往都少過付出，愈擺心機嘅就愈冇人留意。」
誰知一個旅遊節目帶來的不只「魔鬼胸」之名，更給了她另一條出路：「拍完個旅遊節目後，隊crew好欣賞我，仲幫我出寫真，當時有掙扎過驚會有閒言閒語，但難得有人投資我，而且做新人要多元發展先有機會突圍，可以畀大家睇到我嘅另一面，咁點解唔試吓？好幸運出完寫真後多咗人識，仲有得拍廣告同拍戲，所以我冇後悔出寫真o架！」
抗拒裸戲
性感形象為Rainky帶來陸陸續續的演出機會，去年亦過得極為豐收，但她強調不會為性感而性感，更堅持向露點說不：「唔想畀大家淨係記得我性感嘅一面，所以唔會諗裸露演出，就算有都要問准晒屋企人同公司，決定權喺佢哋手上，同埋我嘅底線已經喺寫真集出咗，十年內都唔會再影寫真，可能三十歲之後先再諗啦，就算我上年去南極拍節目着三點式影相，都唔係賣肉sell身材，而係難得可以去到咁遠咁凍嘅地方，可能呢世只係會去一次，所以想挑戰吓自己做啲平時做唔到嘅嘢。」
遇阻滯 家人撐到底
雖然Rainky在演藝路上漸有收成，但工作中難免會遇到不少壓力，幸而她一路上有家人無限的鼓勵，亦不介意她走性感路線：「屋企人對我行性感冇負面睇法，佢哋咩都肯畀我去試，況且我又唔係做啲咩衰嘢，我自己嘅思想亦夠成熟，唔會刻意sell性感。」
一向重情重義的她與家人關係密切，去年在《美人魚》海選時母親遇上交通意外，令她更覺親情的可貴：「由細到大都好想保護爸爸媽媽同細佬，畀最好嘅嘢佢哋，媽咪有事嗰刻我唔喺佢身邊，當時真係好無助，好好彩佢冇事，呢件事令我成長咗好多，更加珍惜同屋企人嘅相處時間！」
兩年內買樓
這三年來，Rainky歌、影、視都試過，去年更進軍商界投資飲食業，荷包進帳不少的她更以兩年內買到樓為目標，但她未被名利沖昏頭腦，反而學識靜待時機：「以前我份人好心急，一味諗住幾時會有更多人賞識我，但依家就學識咗放慢腳步，相信逐步逐步咁行，默默耕耘就會有回報，好似初出道時有人話過我似周秀娜，佢依家咁成功當然好戥佢開心，但我又會同自己講要做到有佢咁嘅成就先叫掂，我一直都冇模仿對象o架，其實做好自己，每日過得開心就夠啦！」
繼續唱歌
百足咁多爪的她去年參演劇集《潮拜武當》，今年更會到內地拍古裝劇《末代御醫》，演出機會多多，她希望未來可嘗試不同戲路：「依家拍戲拍劇好多時都係做細路女角色，未試過有感情線，其實我好想試吓做大人角色，如果有啱嘅角色，只要唔係裸露，我唔介意犧牲o架，好似要我剃光頭都肯，但公司話仲細，等多幾年大個啲先做大人角色啦！」
五光十色的影視界的確吸引，但她亦毋忘自己的歌手身份，現正積極錄歌拍MV於今年出新碟：「由始至終我都冇放棄過唱歌，希望大家知道我係歌手出身，我仲想23歲前可以開到個唱添！」
唔願靠男人
Rainky事業發展穩定，但仍未遇到人生中的Mr. Right，獅子座的她卻不會為拍拖而拍拖：「我係要愛情又要麵包嘅人，依家有人追緊但睇唔啱，我份人好獨立好硬朗，唔鍾意靠男人，睇唔啱咪再等下一個，同埋我唔會因為有家庭就唔做嘢，我好鍾意小朋友好想生BB，但又想有自己嘅事業，想樣樣都兼顧到，不過依家仲係單身，希望快啲搵到如意郎君啦！」
後記：埋位龍精虎猛
青春果然是王道，訪問開始前，蔚雨芯透露自己工作忙碌，連休息時間都不多，加上在內地拍劇時吃得不健康，令皮膚變差，不過一埋位影相，21歲的她便即時變得精靈活潑，還落力地擺Pose，後生真係唔同啲！
文：伍凱頤
攝：吳文聰
服裝：Amelie Street
髮型：Aaron Kwok@Hair Culture
場地：Topiary