林夏薇假槍跟身旁人面青
被無綫力捧的林夏薇工作不斷，她笑言試過同時拍兩劇，背台詞背到「精神錯亂」，更於鏡頭外日日「佗槍」練手感，結果嚇到旁人面青青！
林夏薇早前於無綫播畢劇集《衝線》及《天眼》分別飾演惡女會計師及冒失警花，她自爆拍攝兩劇時被笑精神錯亂。她謂：「兩套角色好唔同，我喺《衝線》裏面做女強人借人上位，喺《天眼》就要做好有衝勁查案嘅小師妹！特別做會計師要背好多專業術語，講嘢快到急口令咁。所以我同屋企人或朋友傾偈都會突然唸咒咁，被佢哋笑我神經錯亂。」
盼甩「林峯堂妹」之名
薇薇為了演活警花，日日「佗槍」練手感，結果嚇窒路人。她說：「我日日隨時袋定支假槍，想養成警察嘅習慣同感覺。有次去洗車，我插咗支槍喺後座，結果嚇到啲職員眼望望，面都青埋。仲有我去旺角拍街景時，埋位前攞槍試位，結果被人叫我唔好隨便喺路上試槍，費事引起騷亂。」
劇接劇的薇薇有望於今年台慶頒獎禮中獲獎，進一步洗去「林峯堂妹」之名。薇薇坦言此名號容易令人忽視自身努力：「我不嬲唔抗拒大家咁叫我，因為係事實，但我會腳踏實地，相信時間可以證明。（名號帶來不良影響？）冇人見到我嘅努力，我哋係不同個體，但無論如何佢都係我堂哥，只希望大家多啲留意我嘅工作。」
文：影視組